دەنساۋلىعى جاقسارعان بايان ەسەنتايەۆا وزدىگىنەن جۇرە باستادى

دارىگەرلەردىڭ ايتۋىنشا، ناۋقاستى ەشكىم مازالاماس ءۇشىن ونى جانساقتاۋ بولىمىنەن پالاتاعا اۋىستىرۋ كەيىنگە قالدىرىلعان دەپ جازادى skifnews.kz.

«قيىندىقتار ارتتا قالدى دەپ ويلايمىن. جاعدايى جاقسارىپ كەلەدى. ورنىنان تۇرىپ، ءجۇرىپ ءجۇر. شامامەن سەنبى كۇنى اۋرۋحانادان شىعارساق پا دەپ جوسپارلاپ وتىرمىز»، - دەيدى تالعار اۋداندىق اۋرۋحاناسى ديرەكتورىنىڭ ەمدەۋ جۇمىستارى بويىنشا ورىنباسارى ەربول سارسەنبايەۆ.

ونىڭ ايتۋىنشا، بايان ەسەنتايەۆانىڭ بۇگىنگى جاعدايى كوڭىل كونشىتەرلىك.

«ول مىقتى ايەل. ءدال مۇنداي جاراقاتتى رۋحى مىقتى ادام عانا جەڭە الادى. ول ءتىپتى، مۇلدەم دارىگەرگە شاعىم ايتقان جوق»، - دەيدى سارسەنبايەۆ.

كوز دارىگەرلەرى دە ەسەنتايەۆانىڭ جانارىنا ءتونىپ تۇرعان قاۋىپتىڭ جوق ەكەنىن ايتۋدا.

ال، الماتى وبلىستىق دەنساۋلىق ساقتاۋ باسقارماسىنىڭ ماماندارى تانىمال پروديۋسەردى اۋرۋحانادان شىققاننان كەيىن دە ەم قابىلداۋىن جالعاستىراتىنىن مالىمدەدى.

ەستەرىڭىزگە سالايىق، بايان ەسەنتايەۆانى 10- ماۋسىم كۇنى ءوزىنىڭ كۇيەۋى باقىتبەك ەسەنتايەۆ سوققىعا جىعىپ، ىشىنە بىرنەشە رەت پىشاق تىعىپ العان بولاتىن. وتباسىلىق داۋ-جانجالدىڭ باستى سەبەبى قىزعانىش بولعان كورىنەدى. مۇنان كەيىن جابىرلەنۋشى اۋىر حالدە اۋرۋحاناعا جەتكىزىلىپ، باستى كۇدىكتىنى ءتارتىپ ساقشىلارى قاماۋعا الدى. سوت تەرگەۋ ءىسى اياقتالعانعا دەيىن ەسەنتايەۆتى 2 ايعا دەيىن قاماۋعا شەشىم شىعارعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى