يليا يلين: سپورتتىق باسەكەدە توقتاتا الماعاندار، وسىلايشا توسقاۋىل بولعىسى كەلەدى
بۇل تۋرالى جۋرناليست ەرجان بايتىلەس Facebook جەلسىندە جاريالادى.
«بوكستىڭ تىلىمەن ايتساق، بۇل بەلدەن تومەن جاسالعان سوققى بولدى. سپورت الاڭىندا جەڭە الماعاسىن، وسىلاي لاڭ سالىپ جاتىر. تۇتاس قازاقستان حالقىنىڭ قولداۋىن سەزىنىپ وتىرمىز. ەلباسى دا ەرەكشە قامقورلىعىن كورسەتۋدە. ءدال قازىر ناقتى بىردەڭە ايتۋ قيىن. ءبىراق ريو وليمپياداسىنا سپورتشى رەتىندە قاتىسا الماسام، وندا باپكەر رەتىندە قاتىسامىن. مەنىڭ تۇتاس كوماندام بار ەكەنىن بىلەسىزدەر. ولار تىنىمسىز ەڭبەك ەتىپ جاتىر. مىنە، وسى كوماندا ەلىمىزگە ۋادە ەتكەن التىن مەدالدىڭ ءبارىن اكەلەدى»، - دەيدى يليا.
قايعى جۇتىپ، قابىرعاسى قايىسىپ، قامىعىپ، قاپالانىپ تۇرعان جوق چەمپيون. ءار كەزدەگىدەي قانى قىزىپ، ارقاسى قوزىپ تۇر. اياقتان شالعانداردىڭ ارەكەتىنە شەكەسىنەن كۇلىپ قارايدى. ويتكەنى ءوزىنىڭ اق ەكەنىن انىق بىلەدى. ال اققا داق جۇقپايدى. بۇل وليمپيادادان شەتتەتىپ تاستاساڭدار، كەلەسىسىنە بارىپ تالقانىن شىعارامىن دەيدى. ءتىپتى بولماسا، ءوزى سەكىلدى تولاعايلاردى تاربيەلەپ شىقپاق.
«ءوز باسىم ومىرگە وتە سەرگەك قارايمىن. قازىر جاسىم 28 دە عانا. ءتورت جىلدان كەيىنگى وليمپيادا كەزىندە دە جەرگە قاراپ قالماسپىن. ەڭ باستى ايتقىم كەلەتىنى مىناۋ: مەن ەشكىمدى الداعان جوقپىن. وسى جەتىستىكتىڭ بارلىعىنا ماڭداي تەر، قاجىرلى ەڭبەگىمنىڭ ارقاسىندا جەتتىم. جاتتىعۋ كەزىندە جانىمدى ايامادىم. مۇرنىمنان قان كەتكەنشە جاتتىقتىم. سوڭعى كەزدەرى ادام بالاسىنىڭ تۇسىنە كىرمەگەن سالماقتاردى كوتەرىپ ءجۇر ەدىم. جاتتىعۋ كەزىندە الەمدىك رەكوردتى 15 كەلى سالماققا جاڭارتىپ تاستاعانمىن. ەكى عانا مۇمكىندىكپەن بۇكىل قارسىلاسىمدى قاپىدا قالدىراتىن جاعدايعا جەتكەنمىن. سپورتتىق باسەكەدە توقتاتا الماعاندار، وسىلايشا توسقاۋىل بولعىسى كەلگەن ەكەن. مۇنى دا كورىپ الايىق»، - دەيدى ەرىڭ!
ءبىر يليانىڭ ورنىنا ونىن الىپ شىقسا قايتەر ەكەن الگى حالىقارالىق اۋىر اتلەتيكا فەدەراتسياسى؟! قىسقاسى، الەمنىڭ بۇكىل تەمىر-تەرسەگىن توبەسىنەن اۋدارىپ تاستاي سالاتىن ءبىزدىڭ باتىر بارلىعىنا دايىن. قالاي بولعاندا دا قازاقستاننىڭ قورجىنىنا ولجا سالماي توقتاماۋعا بەل بۋعان. ەلى ءۇشىن تۋعان ەر وسىنداي-اق بولسىن!
بۇعان دەيىن دوپينگ قابىلدادى دەپ قازاقستاندىق سپورتشىلار - سۆەتلانا پودوبەدوۆا، مايا مانەزا، يليا يلين، زۋلفيا چينشانلو كۇدىككە ىلىنگەن ەدى.
دوپينگ قابىلدادى دەپ ايىپتالعان ءۇش زىلتەمىرشى سپورتتان شەتتەتىلۋى مۇمكىن ەكەنى حابارلاندى. دوپينگ داۋىنا قاتىستى پودوبەدوۆا پىكىرىن ءبىلدىرىپ، يلين حالىقتان قولداۋ سۇراعان بولاتىن.
ولگا شيشيگينا داۋ بولعان دوپينگ ناتيجەسىنە كۇمانمەن قارايتىنىن ايتقان ەدى.
