يمانعالي تاسماعامبەتوۆ «ايبىن دارىنى» بايقاۋىنىڭ جەڭىمپازدارىن ماراپاتتادى - فوتو
«وسەر ەلدىڭ بالاسى ارمانشىل بولادى، وشەر ەلدىڭ بالاسى جانجالشىل بولادى» بۇل ەلباسىمىز - جوعارعى باس قولباسشى نۇرسۇلتان نازاربايەۆتىڭ ءسوزى. بۇگىن مىنە، مەن وسى ورتادا رۋحىن نامىسىنا تۇيگەن، وتانىن جۇرەگىمەن سۇيگەن سول ارمانشىل جاستاردى كورىپ تۇرمىن! سىزدەردىڭ «ەل ەرتەڭىن قورعايمىن» دەگەن قوردالى نيەتتەرىڭىزدى ءبىلىپ تۇرمىن! ولاي دەيتىنىم، وسى جەردە وتكەن بەس كۇندە سىزدەر جاۋىنگەر بولۋدىڭ قىر-سىرىن مەڭگەرىپ قانا قويعان جوقسىزدار. ءوزارا تىرەك بولۋدىڭ، قيىندىقتا كەرەك بولۋدىڭ قادىرىن بىلدىڭىزدەر. وسى ارقىلى ناعىز دوستىقتىڭ نە ەكەنىن سەزدىڭىزدەر»، - دەدى قورعانىس ۆەدومستۆوسىنىڭ باسشىسى جيىنعا قاتىسۋشىلارعا ارناعان سوزىندە.
اسكەري قولدانبالى سپورت ءتۇرى، اسكەري-دالالىق تاكتيكالىق ويىن، سونداي-اق «ايبىن دارىنى» روبوت تەحنيكالارى مەن زياتكەرلىك بايقاۋى بويىنشا جارىستاردا ۇزدىك ناتيجە كورسەتكەن جاستار قورعانىس ءمينيسترىنىڭ قولىنان ناگرادا الۋعا لايىق دەپ تانىلدى. ءال-فارابي اتىنداعى قازاق ۇلتتىق ۋنيۆەرسيتەتى اسكەري كافەدراسىنىڭ ستۋدەنتى داستان راحاتوۆ «مەنىڭ روبوتىم» بايقاۋىنىڭ جەڭىمپازى اتاندى. «مەنىڭ ۇشقىشسىز ۇشۋ اپپاراتىم» بايقاۋىنىڭ ۇزدىگى - «ارىستان» مامانداندىرىلعان ليتسەيىنىڭ تاربيەلەنۋشىسى قايسار بەردىعۇلوۆ، ال «ايبىن دارىنى» زياتكەرلىك ويىنىنىڭ ۇزدىگى رەتىندە سەمەي قالاسىنداعى مامانداندىرىلعان مەكتەپ- ليتسەيىنىڭ تاربيەلەنۋشىسى ەرقانات كەنجەحانوۆ تانىلدى. سەمەي قالاسىنداعى مامانداندىرىلعان مەكتەپ-ليتسەيدىڭ تاربيەلەنۋشىلەرى «ايبىن» جيىنىنىڭ جانە اسكەري-دالالىق تاكتيكالىق ويىننىڭ جەڭىمپازدارى دەپ جاريالاندى.
جالپى كوماندالىق سايىستا ءبىرىنشى ورىندى اسكەري- پاتريوتتىق كلۋبتار اراسىندا - اقمولا وبلىسىنىڭ «باتىر» اسكەري-پاتريوتتىق كلۋبى، ال جوعارى وقۋ ورىندارى اسكەري كافەدرالارىنىڭ اراسىندا - قازاق ۇلتتىق اگرارلىق ۋنيۆەرسيتەتى، رەسپۋبليكالىق اسكەري مەكتەپ-ينتەرناتتارى اراسىندا - سەمەي قالاسىنىڭ مامانداندىرىلعان مەكتەپ-ليتسەيى يەلەندى.
قورعانىس ۆەدومستۆوسىنىڭ باسشىسى روبوت تەحنيكالارى مەن ۇشقىشسىز ۇشۋ اپپاراتتارىنىڭ كورمەسىمەن تانىستى. «جاس ۇلان» اسكەري مەكتەبىنىڭ تاربيەلەنۋشىسى قويان-قولتىق كۇرەستە ءوز شەبەرلىگىن كورسەتسە، ال اسكەري-تەحنيكالىق مەكتەپتىڭ جىگىتتەرى موتوتسيكل مەن كۆادروتسيكلدى جۇرگىزۋدەگى كەرەمەت ونەرلەرىمەن ءتانتى ەتتى. سودان كەيىن اسپانعا ۇشقىشسىز ۇشۋ اپپاراتتارى كوتەرىلدى، ال اۆياتسيالىق وقۋ-جاتتىعۋ ورتالىعىنىڭ كۋرسانتتارى مەن اۋە قورعانىسى كۇشتەرى اسكەري ينستيتۋتىنىڭ جاس ۇشقىش تۇلەكتەرى ۇشۋداعى جەتىستىكتەرىن پاش ەتتى.
«وتاندى ءسۇيۋ - وركەنيەتتىلىكتىڭ ءبىرىنشى بەلگىسى. دەسە دە، ءوسۋ مەن وركەندەۋدىڭ ءوزى - تەك ءوزىن-ءوزى قورعاي الاتىن ەلدەرگە عانا بۇيىراتىن باق. وزدەرىڭىزگە ءمالىم، بيىل ەلىمىزدىڭ تاۋەلسىزدىگىنە 25 جىل. بۇل جىلداردىڭ باستى جەڭىسى دە، ەرتەڭگى جەمىسى دە - بۇگىنگى ۇرپاق - سىزدەرسىزدەر»، - دەدى يمانعالي تاسماعامبەتوۆ.
جاس پاتريوتتاردىڭ ورتاعا شىعىپ، بارلىق جيىنعا قاتىسۋشىلارمەن بىرگە سالتاناتتى انت قابىلداعان ءساتى جابىلۋ ءراسىمىنىڭ ايرىقشا ءساتى بولدى. وسىدان كەيىن «ايبىن» جالاۋى ءتۇسىرىلىپ، جيىن رەسمي تۇردە جابىلدى.
ەستەرىڭىزگە سالا كەتسەك، «ايبىن» ەكىنشى رەسپۋبليكالىق اسكەري-پاتريوتتىق جيىنىنا 800 دەن اسا قازاقستاندىق قىز-جىگىت جينالدى. اتاپ ايتقاندا، ەلىمىزدىڭ بارلىق وڭىرلەرىنەن اسكەري-مەكتەپ ينتەرناتتارىنىڭ تاربيەلەنۋشىلەرى، اسكەري-پاتريوتتىق كلۋبتاردىڭ مۇشەلەرى مەن جوعارى وقۋ ورىندارى اسكەري كافەدرالارىنىڭ ستۋدەنتتەرى كەلدى.
جيىنعا ولاردىڭ ءار قايسىسىن اسكەري قىزمەتشى، پاتريوت بولسام دەگەن نيەتپەن جانە اسكەري ىسپەن اينالىسۋعا دەگەن شىنايى تىلەك جەتەلەپ كەلدى. بيىلعى جىلى ءبىرىنشى رەت «ايبىنعا» قازاقستاننىڭ جوعارى وقۋ ورىندارى اسكەري كافەدرالارىنىڭ كۋرسانت قىزدارى قاتىستى. دەنە توزىمدىلىگى مەن شىدامدىلىققا، دالدىك پەن ەپتىلىككە نورماتيۆتەر تاپسىرۋ ءبىرىنشى سىناق بولاتىن. وسى سىناق بارىسىندا جىگىتتەر بەلاعاشتا كۇشتىك جاتتىعۋلاردى، ال قىزدار - كەشەندى كۇشتىك جاتتىعۋلاردى ورىندادى. سونىمەن قاتار، قاتىسۋشىلار اۆتوماتتى بولشەكتەۋ جانە جيناقتاۋدا ءوز ەپتىلىكتەرىن كورسەتتى. اتىس شەبىندە جاستار ءۇشىن گرانات لاقتىرۋ تاعى ءبىر سىناق ءتۇرى بولدى. بۇدان وزگە لاگەردىڭ اۋماعىندا ناعىز كورمە الاڭى ورىستەتىلدى. بۇل «مەنىڭ روبوتىم» بايقاۋىنا قاتىسۋشىلار روبوت تەحنيكاسى اۋقىمىندا وزدەرى جەتكەن جەتىستىكتەرمەن، سونداي-اق جاڭا يدەيالارمەن تانىستىردى.
ы.
