اۋىر اتلەتيكادان قازاقستان قۇراماسىنىڭ باس باپكەرى ا. ني دوپينگ داۋىنا قاتىستى پىكىرىن ايتتى
ول Vesti.kz سايتىنا بەرگەن سۇحباتىندا كوماندانىڭ سپورتشىلاردىڭ كىناسىزدىگىن سپورت اربيتراج سوتىندا دالەلدەۋگە نيەتتەنىپ وتىرعانىن مالىمدەدى.
نيدىڭ ايتۋىنشا، ول دوپينگتىڭ انىقتالعانى جايلى حاباردى كەشە تاڭدا ەستىگەن. «مەن ءۇشىن بۇل كۇتپەگەن جاڭالىق بولدى. لوندون وليمپياداسى تاريحقا اينالدى عوي، ءبىر جارىم ايدان كەيىن ءبىز وليمپيادا ويىندارىنا اتتانعالى وتىرعانبىز، ال مۇندا وسىنداي داۋ شىقتى... دوپينگ- سىنامالاردى جىل باسىندا ەمەس، ريوعا تۋرا ەكى اي قالعاندا قايتا تەكسەرە باستاعانى الاڭداتادى. مەندە كوپ سۇراق تۋىنداپ وتىر. نەلىكتەن ءدال وسىنداي مەرزىم؟ سپورتشىلار كىناسىزدىگىن دالەلدەپ ۇلگەرمەسىن دەدى مە، اپەللياتسياعا بەرىپ ۇلگەرمەسىن دەدى مە؟»، - دەپ تاڭدانادى باس باپكەر.
الەكسەي ني قويىپ وتىرعان تاعى ءبىر سۇراق ريوعا اتتانعالى وتىرعان سپورتشىلاردىڭ عانا شەتتەتىلۋى جايلى. «سوعان قاراعاندا الداعى وليمپيادادا كىمنىڭ قالاي ونەر كورسەتەتىنىنە بولجام جاسالعان بولۋى مۇمكىن، ال شەتتەتىلگەن سپورتشىلاردىڭ التىن مەدال الۋعا دەگەن مۇمكىندىگى زور. مانساپ جولىن اياقتاعالى جاتقان بىردە- ءبىر سپورتشى شاقىرتىلمادى، سەبەبى ولار ەندىگى ەشكىمگە كەرەك ەمەس. ولاردىڭ لوگيكاسىنا سالساق، ءبىز وليمپيادادا ءبىر رەت جەڭگەننەن كەيىن دەرەۋ سپورتپەن قوش ايتىسۋىمىز قاجەت پە؟! جەڭىستەن ءۇمىتتى بولىپ، بىرەۋلەرگە كەدەرگى جاساي باستاساڭ - ساعان ادىلەتسىز ادىستەردى قولدانادى. سەبەبى مەن الەم بىرىنشىلىگىنە ءبىر اي قالعاندا عانا وسىنداي داۋدىڭ شىعىپ جاتقانىن باسقاشا تۇسىندىرە المايمىن. مۇنداي قىم- قۋىت جاعدايدا ەكى اتتاپ بيگە شىعاتىن مۇمكىندىك از»، - دەپ ءبىلدىردى پىكىرىن الەكسەي ني.
ني لوزانناداعى زەرتحانانىڭ ماسەلەسىنە دە نازار اۋدارىپ وتىر. ايتۋىنشا، بۇل زەرتحانا ا جانە ب سىنامالارىن تەكسەرگەن. سويتسە ا سىنامالارىندا تىيىم سالىنعان زاتتاردىڭ بار ەكەنىن كورسەتىپ، ب سىناماسى ونى جوققا شىعارعان. «ۆادا تىركەگەن زەرتحانا قالايشا وسىنداي قاتەلىكتەر جاسايدى؟ مەن بىرەۋ- مىرەۋدى ۇركىتىپ، بوپسالاعىم كەلمەيدى، مەن تەك ءوز سپورتشىلارىمدى قورعاعىم كەلەدى، ادىلدىكتىڭ بولعانىن قالايمىن، - دەيدى باس باپكەر، - مۇنىڭ كىمنىڭ مۇددەسى ەكەنىن مەن بىلمەيمىن. مەن ساياساتكەر ەمەسپىن، كورىپكەل ەمەسپىن. مەن - ەشتەڭەگە قاراماستان سپورتشىلاردى دايىنداپ جۇرگەن باپكەرمىن. سپورتشىنىڭ بارلىعى جاتتىعىپ جاتىر جانە ماسەلە انىق بولىپ، ءبىزدىڭ پايدامىزعا شەشىلەدى دەپ سەنەمىن. ال ەگەر وليمپياداعا جىبەرمەسە، لوزانناداعى اربيتراج سوتىنا دەيىن بارامىز. سپورتشىلاردىڭ سوتتان ءادىل شەشىم العانىن كورمەپپىن، الايدا جارىستى ەشكىم توقتاتا المايدى... وسىعان قاراماستان وسىنداي جاعدايلار قايتالانباۋى ءۇشىن ءوز ۇستانىمىمىزدا قالا بەرمەكپىز»، - دەدى ول.
سونىمەن قاتار، باس باپكەر ءتورت سپورتشى قولداندى دەلىنگەن پرەپاراتتارعا قاتىستى ويىن ايتتى. «ءبىز ونداي پرەپاراتتاردى قولدانباعانىمىزدى سەنىممەن ايتا الامىن. انىقتامالىققا قاراپ كورىڭىزدەر، بۇل وتە كۇردەلى پرەپاراتتار، ال جوعارى دەڭگەيلى سپورتشىلار وسىلاي قاۋىپ- قاتەرگە بارا ما؟»، - دەيدى باس باپكەر.
باپكەردىڭ ايتۋىنشا، دوپينگ داۋىنا ىلىگىپ جاتقانداردىڭ كىل ت م د ەلدەرىنەن ەكەندىگى دە كۇمان تۋعىزباي قويمايدى. ول حيۋستونداعى چەمپيوناتتان كەيىن قازاقستاندىق اۋىراتلەتتەردىڭ بىرەۋلەردىڭ نىسانىنا تۇسەتىنىن ويلاعانىن دا ايتىپ وتىر. وسىعان دەيىن يليا يلين ريو وليمپياداسىنا دايىندالىپ جاتقانىن، سوڭىنا دەيىن كۇرەسەتىنىن ايتقان ەدى.
ەسكە سالايىق، ماۋسىم ايىنىڭ باسىندا شەتەلدىك اقپارات قۇرالدارى قازاقستاندىق اۋىراتلەتتەردىڭ قانىنان دوپينگ تابىلعانى جونىندە حابارلاعان بولاتىن. ولاردىڭ مالىمەتىنشە، يليا يلين مەن ءزۇلفيا چينشانلو الداعى وليمپيادا ويىندارىنا قاتىسا الماۋى مۇمكىن. كەيىن قازاقستاننىڭ ۇلتتىق وليمپيادا كوميتەتى قازاقستاندىق سپورتشىلاردىڭ "ب" دوپينگ سىنامالارىنىڭ قوسىمشا تەكسەرىلۋ پروتسەدۋراسىن راستاپ، بەس زىلتەمىرشىنىڭ قانىنان تابىلعان زاتتاردىڭ كۇمان تۋعىزعانىن حابارلادى.
