ءبىلىم ءمينيسترى ورىس ءتىلدى دەپۋتاتتاردى قازاق ءتىلىن جەدەلدەتىپ ۇيرەتەتىن توپقا قاتىسۋعا شاقىردى
ايتا كەتەرلىگى، جالپى وتىرىستا 2015 - جىلعى بيۋدجەتتىڭ اتقارىلۋى تۋرالى ۇكىمەتتىڭ ەسەبىن تالقىلانعان بولاتىن.
تالقىلاۋ بارىسىندا سەناتور سەرگەي ەرشوۆ ءبىرقاتار ارىپتەستەرىمەن بىرگە مەملەكەتتىك ءتىلدى ۇيرەنىپ جۇرگەنىن، الايدا ول باعدارلامانى قارجىلاندىرۋ بيىلعى جىل باسىنان بەرى توقتاتىلعانىن ايتتى. «قازىر پارلامەنتتە دە، مەملەكەتتىك ورگانداردا دا قازاق ءتىلىن مەڭگەرۋگە قاتىستى وقىتىلىپ جاتقان جوق. ءبىز وسىعان بايلانىستى بارلىق مينيسترلىكتەرگە حابارلاستىق. الايدا، ناقتى جاۋاپ العانىمىز جوق. كونستيتۋتسيادا ۇكىمەت ەلىمىزدىڭ ازاماتتارىنىڭ بارلىعىنا، ونىڭ ىشىندە مەمەلكەتتىك قىزمەتكەرلەرگە مەملەكەتتىك ءتىلدى ەركىن مەڭگەرۋى ءۇشىن بارلىق جاعدايدى جاسايدى دەپ كورسەتىلگەن. وسىعان قاتىستى ءبىز مەملەكەتتىك ءتىل جونىندەگى باعدارلامانى توقتاتپاۋدى، قايتا ونى جاڭعىرتۋدى سۇرايمىز»، دەدى سەناتور س. ەرشوۆ.
ءوز كەزەگىندە مادەنيەت جانە سپورت ءمينيسترى ارىستانبەك مۇحامەدي ۇلى بىلتىر قارجىلىق جاعدايعا بايلانىستى ءبىرقاتار باعدارلامالار قىسقارتىلعانىن، دەگەنمەن، تۇتاستاي العاندا قازاق تىلىنە قاتىستى ماسەلەلەر اتقارىلىپ جاتقانىن ايتتى. «ءبىز بيۋدجەتتى الداعى بەكىتۋ بارىسىندا وسىنداي ولقىلىقتاردى جويۋعا تىرىسامىز دەپ ويلايمىن»، دەدى ا. مۇحامەدي ۇلى.
ال ءبىلىم جانە عىلىم ءمينيسترى ەرلان ساعاديەۆ مەملەكەتتىك تىلگە وقىتۋعا قاتىستى ءادىسنامانىڭ ءالى كۇنگە ناشار دەڭگەيدە قالىپ وتىرعانىنا توقتالدى. «ءبىز قازاق تىلىنە وقىتۋ ءادىسىن تۇبەگەيلى وزگەرتەتىن بولامىز. ورىس تىلىندە قازاق تىلىنەن ساباق بەرەتىن مۇعالىمدەر قاۋىمىمەن كۇنى كەشە كەزدەستىك. ولاردىڭ جانە باسقا دا ءتىل ماماندارىنىڭ ۇسىنىستارىن ەسكەرە كەلە، اعىمداعى جىلدىڭ جەلتوقسان ايىنا دەيىن ءبىز قاجەتتى ءادىسنامالاردى دايىنداپ شىعىپ، قازاق تىلىنە وقىتاتىن مەكتەپتەرگە جانە جالپى حالىق ءۇشىن ونى ەنگىزۋدى قاراستىرامىز. جەدەل وقىتۋ ادىستەرى عىلىمي نەگىزدەرگە سۇيەنەدى، وندا بارلىق زاماناۋي تەحنولوگيالار قولدانىلادى. ءبىز ءماجىلىستىڭ ورىس ءتىلدى دەپۋتاتتارىن اعىمداعى جەلتوقسان ايىندا اشىلاتىن مەملەكەتتىك تىلگە جەدەل وقىتۋ توبىنا قاتىسۋعا شاقىرتۋ جولدادىق. سەنتورلاردى دا مەملەكەتتىك تىلگە جەدەل وقىتاتىن توپقا قاتىسۋ ءۇشىن جازىلۋعا شاقىرامىز»، دەدى ە. ساعاديەۆ.
اۆتور: قانات مامەتقازى ۇلى
