جەرگىلىكتى بيلىك پەن مەملەكەتتىك ورگاندار جۇمىسى بيۋدجەتتىڭ يگەرىلۋىنە ەمەس، ناتيجەگە قاراي باعالاناتىن بولادى - د. نازاربايەۆا
بۇگىن پارلامەنت سەناتىنىڭ جالپى وتىرىسىندا 2015 - جىلعى رەسپۋبليكالىق بيۋدجەتتىڭ اتقارىلۋى تۋرالى ۇكىمەت ەسەبىن تالقىلاۋ بارىسىندا ق ر پرەمەر- ءمينيسترىنىڭ ورىنباسارى داريعا نازاربايەۆا وسىلاي ءمالىم ەتتى.
«بۇگىنگى كۇردەلى ەكونوميكالىق جاعدايدا ءبىز اسىرەسە بيۋدجەتتەگى كەمشىلىكتەردى جويۋعا مەيلىنشە نازار اۋدارىپ وتىرمىز. ءبىز بارلىق تەرىس سالداردى، بيۋدجەتتى اتقارۋ بارىسىندا جىبەرىلگەن كەمشىلىكتەردى ءبىلىپ وتىرمىز. الداعى ۋاقىتتا كۇش جىگەردى تولىق سوعان جۇمىلدىرامىز»، دەدى د. نازاربايەۆا. سونىمەن قاتار، ۇكىمەت باسشىسىنىڭ ورىنباسارى بيىلعى جىلدان باستاپ ۇلت جوسپارىنا سايكەس، ءبىرقاتار جاڭا زاڭ نورمالارى كۇشىنە ەنگەنىن اتاپ ءوتىپ، ونىڭ ىشىندە حالىققا ەسەپ بەرەتىن مەملەكەت باعىتىندا اشىقتىق ماسەلەسىنە قاتىستى كوپتەگەن شارالار قامتىلىپ وتىرعانىن اتاپ ءوتتى.
«بۇل باعىتتا قوعامدىق ينستيتۋتتار، قوعامدىق كەڭەستەر قۇرىلدى. مەملەكەتتىك ورگاندار مەن جەرگىلىكتى اتقارۋشى بيلىك ورگانداردىڭ قىزمەتىن باعالايتىن جاڭا قاعيداتتار بەكىتىلدى. بۇل جۇمىس تاۋەلسىز ساراپشىلاردىڭ، مەملەكەتتىك ورگانداردىڭ، مەملەكەتتىك اۋديتتىڭ باعالاۋىمەن تاۋەلسىز جۇرگىزىلەتىن بولادى. ماسەلەن، ءارتۇرلى دەڭگەيدەگى بيلىكتىڭ جۇمىسى بيۋدجەتتىڭ يگەرىلۋ پايىزىنا قاتىستى ەمەس، ونىڭ ناتيجەلىلىگىنە قاتىستى باعالاناتىن بولادى. نىسانالى ينديكاتورلار باقىلاناتىن بولادى. مەملەكەتتىك ورگاندار مەن جەرگىلىكتى ورگاندار اراسىندا مەموراندۋمدارعا قول قويىلدى، ولار بەلگىلى ءبىر جاۋاپكەرشىلىكتەرگە يە بولدى. سوندىقتان دا، كەلەسى جىلى 2016 -جىلعى بيۋدجەتتىڭ يگەرىلۋى تۋرالى ەسەپ بۇگىنگىدەن ساپالىراق بولادى دەپ ويلايمىز»، دەدى د. نازاربايەۆا.
اۆتور: قانات مامەتقازى ۇلى
