دەنساۋلىق: جۇكتى ايەلدىڭ ءتىس كۇتىمى

ماسەلەن، كالتسيدىڭ، فتور جانە فوسفوردىڭ جەتكىلىكسىزدىگى - سۇيەك پەن ءتىستىڭ بوساۋىنا، شاشتىڭ تۇسۋىنە الىپ كەلەدى. نازارلارىڭىزعا جۇكتىلىك كەزىندە انالار مارجانداي تىزىلگەن تىستەرىن ساۋ كۇيىندە ساقتاۋدىڭ جولدارىن ۇسىنامىز، دەپ جازادى «ماسساگەت» پورتالى دەنساۋلىق ايدارىندا.

ءتىستىڭ بەرىكتىگى، اقتىعى، ساۋلىعى كالتسيدىڭ جەتكىلىكسىزدىگىنە نەمەسە شامادان تىس ارتىق بولۋىنا بايلانىستى. جۇكتى ايەلدەردىڭ اراسىندا ءجيى كەزدەسەتىن قيىندىقتاردىڭ ءبىرى - قىزىل يەكتىڭ قانتالاۋى. ونى گينگيۆيت نەمەسە پارودونتوز دەپ اتايدى. بۇل جۇكتى ايەلدەردىڭ بويىندا گورمونالدى وزگەرىستەر سالدارىنان تۋىندايدى. ەگەر ءتىس تازالاعاندا شەتكاڭىزدىڭ قانعا بويالعانىن كورسەڭىز دەرەۋ دارىگەردىڭ قابىلداۋىنا بارعانىڭىز ءجون. مامان ءتىسىڭىزدىڭ اۋىرۋ سيپاتىنا قاراي قاجەتتى ەم شارالارىن تاعايىندايدى.

 جۇكتىلىك يممۋندى جۇيەنى السىرەتەتىندىكتەن اۋىز قۋىسىندا ميكروورگانيزمدەردىڭ ءومىر سۇرۋىنە جاقسى جاعداي تۋادى. بارىمىزگە بەلگىلى مۇنداي جاعدايدا ءتىس جەگى، قىزىل يەك اۋرۋلارى تەز ورىن الادى. دەر كەزىندە الدىن الىپ، ەمدەۋدى باستاماسا ءتىس جەگىسى جۇيكە جۇيەسىنىڭ پۋلپيتىنە نەمەسە پەريودونتيتكە الىپ كەلەدى. كوڭىل بولمەي جۇرە بەرسەڭىز، ءسابيدىڭ اعزاسىنا ينفەكسيا ءتۇسۋى ىقتيمال. ال بۇل بالانىڭ بولاشاقتا اللەرگيالىق اۋرۋلارعا بەيىم بولۋىنا الىپ كەلەدى.

جۇكتىلىك كەزىندە ءتىس دارىگەرىنە بارۋدىڭ قانشالىقتى دۇرىس ەكەندىگى كەز كەلگەن انانى مازالايتىنى زاڭدى. ءتىس دارىگەرىنە جۇكتى ەكەنىڭىزدى ەسكەرتۋدى ۇمىتپاساڭىز، قۇرساقتاعى سابيگە زيانى تيمەيتىندەي بارلىق ادىستەردى قاراستىرادى.

ەستە ۇستاڭىز!

جالپى جۇكتىلىك كەزەڭىندە ستوماتولوگ كابينەتىنە بولاشاق انا كەم دەگەندە 3 رەت بارۋى ءتيىس. العاشقى باس سۇعۋ - 20 اپتاعا دەيىن، ەكىنشى رەت 20 مەن 32 اپتا ارالىعىندا، ءۇشىنشى رەت 32 اپتادان سوڭ.

ءتىس اۋرۋى مازالاعان جاعدايدا ءبىرىنشى ءۇش ايلىقتا تەك ءتىس جەگىدەن تازالاپ، پلومبا سالىپ، ءتىستى تازالاۋ پروتسەدۋرالارىن جاساۋعا رۇقسات بەرىلسە، ەكىنشى ءۇش ايلىقتا رەنتگەن زەرتتەۋلەر جاساۋعا بولادى. ويتكەنى، بالا اعزاسى بۇل كەزەڭدەردە سىرتقى ورتادان كەلەتىن قاۋىپتەردەن قورعانا الادى. تەك ارنايى رەنتگەن ساۋلەلەرىنەن قورعايتىن الجاپقىشتى ايەلدىڭ ىشىنە جابۋ كەرەك.

جۇكتىلىك كەزەڭىندە قۇرامىندا ادرەنالينى بار دارىلەردى سالۋعا بولمايدى. سونىمەن قاتار، اعارتۋ، پروتەزدەۋ جۇمىستارىن جۇرگىزۋگە رۇقسات بەرىلمەيدى.

ءتىس دارىگەرىنىڭ ەسىگىن ءجيى قاققىڭىز كەلمەسە مىناداي قاراپايىم اۋىز قۋىسىن تازا ۇستاۋ ەرەجەلەرىن ەستە ۇستاڭىز:

1. ءتىستى كەم دەگەندە كۇنىنە 2 رەت جۋۋ كەرەك. ءار ءتىستىڭ اراسىن مۇقيات تازالاپ، تاعام قالدىقتارىنىڭ قالماۋىن قاداعالاڭىز.

2. ءار تاماقتانۋدان سوڭ اۋىز قۋىسىن سۋمەن شايىپ وتىرىڭىز.

3. تىسپەن قاتار ءتىل، تاڭداي، ۇرتتى دا تازالاعان ءجون.

4. قۇرامىندا كالتسيي، فتور، فوسفورى مول تاعامداردى تۇتىنىڭىز.

ەڭ دۇرىسى، جۇكتى بولماي تۇرىپ ستوماتولوگقا كورىنگەن دۇرىس. اۋىز قۋىسىندا پايدا بولعان نەمەسە پايدا بولاباستاعان اۋرۋلاردىڭ الدىن الۋ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى