ق ر پرەزيدەنتى جانىنداعى سىبايلاس جەمقورلىققا قارسى كۇرەس ماسەلەلەرى جونىندەگى كوميسسيانىڭ اتاۋى وزگەرتىلدى
«سىبايلاس جەمقورلىققا قارسى ءىس- قيمىل تۋرالى زاڭنىڭ قابىلدانۋىنا بايلانىستى پرەزيدەنتتىڭ جارلىعىمەن كوميسسيانىڭ اتى وزگەرتىلدى. ەندى ول ق ر پرەزيدەنتى جانىنداعى سىبايلاس جەمقورلىققا قارسى ءىس- قيمىل ماسەلەلەرى جونىندەگى كوميسسيا دەپ اتالاتىن بولادى. كوميسسيا قۇرامىنان باسقا جۇمىسقا اۋىسۋىنا بايلانىستى سۇلەيمەنوۆ قايىربەك شوشان ۇلى شىعارىلدى»، - دەدى كەشە اقوردادا كوميسسيا وتىرىسىن اشقان ق ر مەملەكەتتىك حاتشىسى گۇلشارا ءابدىقالىقوۆا.
مەملەكەتتىك حاتشى ءوز سوزىندە بۇگىنگى وتىرىس بارىسىندا ءبىلىم بەرۋ سالاسىنداعى سىبايلاس جەمقورلىققا قارسى ءىس- قيمىل بويىنشا قابىلدانعان شارالار، ق ر ۇلتتىق قورى قاراجاتىن پايدالانۋ اشىقتىعى مەن تيىمدىلىگىن قامتاماسىز ەتۋ جونىندەگى شارالار، مەملەكەتتىك ورگانداردا سىبايلاس جەمقورلىق دەڭگەيىنىڭ رەيتينگىن قالىپتاستىرۋ ماسەلەلەرى بويىنشا قابىلدانعان ءىس- شارالار تالقىلاناتىندىعىن اتاپ ءوتتى.
كوميسسيا وتىرىسىنا بەينە سەلەكتورلىق رەجىمدە وبلىستاردىڭ، استانا جانە الماتى قالالارىنىڭ اكىمدەرى، سىبايلاس جەمقورلىققا قارسى ءىس- قيمىل جونىندەگى وڭىرلىك كوميسسيالاردىڭ مۇشەلەرى، ءبىلىم دەپارتامەنتتەرىنىڭ باسشىلارى جانە جوعارى وقۋ ورىندارىنىڭ رەكتورلارى قاتىستى.
جيىن بارىسىندا ق ر باس پروكۋرورى ج. اسانوۆتىڭ، ۇلتتىق بانك ءتوراعاسى د. اقىشيەۆتىڭ، قارجى ءمينيسترى ب. سۇلتانوۆتىڭ، ءبىلىم جانە عىلىم ءمينيسترى ە. ساعاديەۆتىڭ، مەملەكەتتىك قىزمەت ىستەرى ءمينيسترى ت. دوناقوۆتىڭ باياندامالارى تىڭدالدى.
