نازىم قىزايبايدىڭ جەكە باپكەرى ءبىر جىلعا جۇمىسىنان شەتتەتىلدى
بۇدان باسقا، باپكەر الەم چەمپيوناتىنىڭ بارلىق جۇلدەرگەرلەرىنىڭ جەكە تالىمگەرلەرى الاتىن سىيلىقتان قاعىلدى.
بۇل شەشىم 15 -ماۋسىمدا استانادا قازاقستان بوكس فەدەراتسياسى اتقارۋشى كوميتەتى بيۋروسىنىڭ وتىرىسىندا قابىلداندى. بۇعان ونىڭ قازاقستاندىق جاڭالىقتار پورتالىنىڭ بىرىنە بەرگەن سۇحباتىنداعى باپكەرلىك كەڭەس شەشىمىن سىناۋى، «قىسىم كورسەتتى» دەپ شاعىمدانعانى جانە استانادا وتكەن الەم چەمپيونتانىنداعى «سۇمدىق جاعدايلار» بولعانىن مالىمدەگەنى سەبەپ بولدى.
«بۇل سۇحبات جاريالانعاننان كەيىن ءبىز ءومىرزاقوۆقا تەرگەۋ جۇرگىزۋ ءۇشىن ونىڭ ايىپتاۋىنا دالەل بەرۋدى نە جوققا شىعارۋدى ۇسىندىق. ەشبىر دالەل ۇسىنبادى، وسىدان-اق ونىڭ مالىمدەمەسى بوس اڭگىمە ەكەنىن بايقاۋعا بولادى. ق ب ف ءتىپتى ەكى دۇركىن الەم چەمپيونىنىڭ باپكەرى بولماق تۇگىل كىم بولسا دا، مۇنداي جاعدايعا بەي- جاي قاراپ وتىرمايدى، ءوز بەدەلىن قورعايدى»، - دەدى بوكس بويىنشا مەملەكەتتىك باپكەر بولات ءابدىراحمانوۆ.
