ورالدىق مۇگەدەك كاسىپكەر سال اۋرۋىنا ۇشىراعان بالالارعا ارنالعان قۇرىلعى جاساپ شىعاردى - فوتو

كاسىپكەردىڭ سوزىنە قاراعاندا، وتكەن جىلعى قازان ايىندا استانا قالاسىندا الەۋمەتتىك جوبالارعا ارنالعان جيىندا قازاقستاندا سال اۋرۋىنا شالدىققان بالالارعا ارنالعان قۇرىلعى شىعاراتىن كاسىپورىن جوق ەكەندىگىن، ونى ەلىمىز رەسەي، تۇركيا، گەرمانيادان اكەلەتىنىن بىلگەن.

سول ساپاردان ورالعاننان كەيىن بالالاردى ەمدەيتىن «شاپاعات» مەديتسينالىق الەۋمەتتىك مەكەمەسىنىڭ دارىگەر ماماندارىمەن كەڭەسىپ، رەسەيلىك ونىمدەردىڭ ولقىلىقتارىن ەسكەرە وتىرىپ، تىك تۇرعىزعىشتاردى (ۆەرتيكاليزاتور) شىعارۋدى قولعا الدى. كاسىپكەر وتىزدان استام تىك تۇرعىزعىشتى رامازان ايىندا وڭىردەگى ارنايى ەمدەۋ مەكەمەلەرى مەن قوعامدىق ۇيىمدارعا تەگىن تارتۋ ەتىپ وتىر. وبلىستا دتسپ اۋرۋىمەن سىرقاتتاناتىن 900 دەن استام بالا ەسەپتە تۇر.

تىك تۇرعىزعىشتاردىڭ نارىقتاعى باعاسى 250 مىڭ تەڭگەدەن باستاپ 1 ميلليون تەڭگەدەن اسادى. ال ورالدىق كاسىپكەر شىعارعان قۇرىلعىلاردىڭ قۇنى 35 مىڭ تەڭگە مەن 120 مىڭ تەڭگە ارالىعىندا بولماق. مۇنداي قۇرىلعىلاردى ساتىپ الۋ ءۇشىن مەملەكەت جىل سايىن 5 ميلليارد تەڭگەگە جۋىق قارجى بولەدى. ەگەر جەرگىلىكتى جەردە قولعا الىنسا، شىعىن ەكى- ءۇش ەسە ازايار ەدى.

ءبىرجان قوجاقوۆ باسشىلىق ەتەتىن «عيبادات» ج ش س- ىندا وبلىس اكىمى التاي كولگىنوۆ بولىپ، كاسىپكەردىڭ قادامىنا قولداۋ ءبىلدىردى. ءوڭىر باسشىسىنىڭ ايتۋىنشا، سال اۋرۋىنا ۇشىراعان بالالارعا ارنالعان قۇرىلعىلاردى شىعارۋ ءۇشىن جاڭا قوندىرعىنى الۋعا «يۋنيسەرۆ» كومپانياسى كومەكتەسىپ، 5,5 ميلليون تەڭگە بولگەن.

كاسىپكەردىڭ ءمالىم ەتكەنىندەي، ماۋسىم ايىندا ىسكە قوسىلاتىن جاڭا قوندىرعىنىڭ كومەگىمەن تىك تۇرعىزعىشتاردىڭ 33 ءتۇرىن شىعارۋعا بولادى.

ايتا كەتەيىك، 1971 -جىلى اقجايىق اۋدانىندا دۇنيەگە كەلگەن ءبىرجان قوجاقوۆ جول پوليتسياسىندا قىزمەت ەتىپ جۇرگەن كەزدە قىستا قاتتى سۋىققا ۇرىنىپ، قوس اياعىنان بىردەي ايىرىلعان. سوندا دا مويىماي، 2002 -جىلدان باستاپ تۋمبوچكا، شكاف، كەرۋەرت سىندى جيھاز جاساۋدى قولعا العان. 2010 -جىلى «عيبادات» ج ش س- ىن قۇرىپ، قازىر مۇندا قىرىققا جۋىق ادام ەڭبەك ەتسە، سونىڭ جيىرما شاقتىسى - مۇمكىندىگى شەكتەۋلى شەكتەۋلى جاندار. كاسىپورىن ۇلتتىق ويۋ-ورنەكپەن بەزەندىرىلگەن ءبىر عانا ساندىقتىڭ 50 گە جۋىق ءتۇرىن شىعارادى. بەسىكتەردىڭ جينالمالى ءتۇرى دە جاسالۋدا. سول سەكىلدى قازاقى ۇستەل، جەر ۇستەل، ورىندىق سەكىلدى ونىمدەرى كورشى وبلىستارعا دا ءوتىپ جاتىر.

مۇگەدەك بالالار ءۇشىن وسىلايشا قامقورلىق جاساعان ب. قوجاقوۆ الداعى ۋاقىتتا تىگىن سەحىن دا اشىپ، ۇيلەرىندە وتىرعان مۇگەدەك ايەلدەردى جۇمىسقا قوسقىسى كەلەدى.

 
     

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى