استانادا «ۇلت جاۋھارلارى» فوتوجيناعىنىڭ تانىستىرىلىمى ءوتتى - فوتو
سالتاناتتى كەشتى اقىن، قوعام قايراتكەرى اكىم ىسقاق جۇرگىزە وتىرىپ، كىتاپتىڭ جالپى بولمىسىن تانىستىردى. جيىندا ءسوز العان عالىمدار مەن ونەر قايراتكەرلەرى عاريفوللا ەسىم، كوپەن امىربەك، ءالي بەكتايەۆ، سەرىك سەيدۋمانوۆ، ورازكۇل اسانعازى، ەرمەك اسىلحانوۆ، بيبىگۇل جەكسەنباي قاتارلى ادامدار ءوز اسەرلەرىمەن بولىسسە، ءانشى دوسىمجان تاڭاتاروۆ پەن تامارا اسار اننەن ءشاشۋ شاشتى.
شارانىڭ نەگىزگى اۆتورى جانە ونىڭ اتقارعان شارۋالارى تۋرالى ايتار بولساق، 2011 -جىلى بەلگىلى كوللەكسيونەر، ونەرتانۋشى باحارگۇل تولەگەننىڭ ۇيتقى بولۋىمەن، الماتى قالاسىندا «ادەمى-اي» ونەر مۇراجايى اشىلعان ەدى. قازىرگى تاڭدا مۇنداعى جادىگەرلەر سانى 1000 نان اسادى. مۇراجاي ەكسپوزيتسيالارىنان ب. ز. د. I - III ع ع. كۋشان پاتشالىعىنىڭ ارحەولوگيالىق ارتەفاكتىلەرى مەن VI - ХII ع ع. جاتاتىن تاريحي قۇندى جادىگەرلەرمەن تانىسۋعا بولادى.
وسكەلەڭ ۇرپاق كورىپ، ءبىلىپ ءجۇرسىن دەگەن ماقساتپەن اتالعان قۇندى مۇرالاردىڭ سۋرەتتەرىنەن توپتاستىرىلعان «ۇلت جاۋھارلارى» اتتى فوتوجيناق قۇراستىرىلدى. باحارگۇل تولەگەن قىزى ەلباسى ن. ءا. نازاربايەۆتىڭ قابىلداۋىندا بولىپ، پرەزيدەنتىمىز قازاق قىزىنىڭ ۇلتىنىڭ مادەني مۇراسىن ساقتاپ، زەرتتەۋ قىزمەتىنە جوعارى باعا بەرگەن بولاتىن.
باحارگۇل تولەگەن - كوللەكسيونەر- ەتنوگراف، قازاقستانداعى تۇركى حالىقتارىنىڭ سيرەك كەزدەسەتىن التىن جانە كۇمىس بۇيىمدارىنىڭ جالعىز جەكە مۇراجايىنىڭ يەسى. سونىمەن قاتار، قازاقى كادەسىيلاردىڭ ۇلتتىق برەندىن قالىپتاستىرعان «ادەمى-اي» كومپانياسىنىڭ پرەزيدەنتى. بالالىق جانە جاستىق شاعىن قىتاي حالىق رەسپۋبليكاسىندا وتكىزگەن باحارگۇل، 1994 -جىلى تاريحي وتانىنا ورالىپ، بالا كەزىندەگى ارمانىنا قول جەتكىزدى. سول ساتتەن باستاپ باحارگۇل بويىنداعى بار قايرات- جىگەرىن قازاقتىڭ ۇلتتىق مادەنيەتىن ناسيحاتتاۋعا، ءارى قۇندى تاريحي جادىگەرلەردى جيناقتاپ، ساقتاۋعا ارنادى.
ول رەسپۋبليكا مادەنيەتى مەن ونەرىن دامىتۋعا قوسقان قوماقتى ۇلەسى ءۇشىن 2010- جىلى ق ر مادەنيەت قايراتكەرى اتاعىنا يە بولدى. سول جىلى ەلىمىزدىڭ 30 تانىمال ايەلدەرى قاتىسقان «قازاقستان ايەلى - 2010» اتتى جوباسىنىڭ جەڭىمپازى اتاندى. 2013-جىلى ەلباسى جارلىعىمەن «ەرەن ەڭبەگى ءۇشىن» مەدالىمەن ماراپاتتالدى. «ۇلت جاۋھارلارى» فوتوجيناعى ارقىلى ءسىز ەتنوگرافيالىق بۇيىمداردىڭ كەرەمەت جانە باي كوللەكسياسىمەن تانىسۋ مۇمكىندىگىنە يە بولاسىز.
ۇلاربەك دالەي ۇلى
فوتو: جاندوس كوكۋمبايەۆ
دەرەككوز: baq.kz
