اقتوبەدە تىنىشتىق پەن قاۋىپسىزدىك قالپىنا كەلتىرىلدى - ك. ءماسىموۆ

شاراعا ءبىرقاتار مەملەكەتتىك ورگاندار جانە ۇلتتىق كومپانيالار باسشىلارى، وبلىس اكتيۆى مەن قوعام وكىلدەرى قاتىستى.

جيىندى اشقان ك. ءماسىموۆ اقتوبەگە ەل پرەزيدەنتى نۇرسۇلتان نازاربايەۆتىڭ تاپسىرماسىمەن كەلگەنىن ايتتى.

«بۇگىن مەملەكەت باسشىسىنا وڭىردەگى جاعداي باقىلاۋدا ەكەنىن ايتتىم. بەيبىتشىلىك، تىنىشتىق پەن قاۋىپسىزدىك قالپىنا كەلتىرىلدى. بۇل وتە ماڭىزدى»، - دەدى ك. ءماسىموۆ. سونىمەن قاتار ول ايماقتا وزەكتى ماسەلەلەر شەشىلىپ، ازاماتتاردىڭ قاۋىپسىزدىگىن قامتاماسىز ەتۋ بويىنشا قوسىمشا شارالار قابىلداندى، تەراكت قۇرباندارىنىڭ تۋىستارىنا ءتيىستى جاردەم كورسەتىلدى، دەپ اتاپ ءوتتى.

وبلىس اكىمى بەردىبەك ساپاربايەۆ پرەمەر- مينيسترگە اعىمداعى جىلدىڭ 5 ايىنداعى الەۋمەتتىك- ەكونوميكالىق دامۋ قورىتىندىلارى، 100 ناقتى قادام - ۇلت جوسپارى، يندۋستريالىق- يننوۆاتسيالىق دامۋ، «نۇرلى جول» باعدارلامالارىنىڭ جۇزەگە اسۋى، بيزنەستى قولداۋ بويىنشا قابىلدانىپ جاتقان شارالار، ونەركاسىپ پەن اۋىل شارۋاشىلىعى سالاسىندا شىعارىلاتىن ءونىم كولەمى ارتقانى جايلى باياندادى.

جيىن قورىتىندىسى بويىنشا ك. ءماسىموۆ ايماقتى دامىتۋ بويىنشا وبلىس باسشىسىنا ءبىرقاتار مىندەتتەر جۇكتەدى. پرەمەر- مينيستر الەۋمەتتىك ماسەلەلەردى شەشۋگە - ەڭبەكپەن قامتۋ، مەكتەپتەر مەن بالاباقشالاردىڭ قۇرىلىسى، جاستارمەن جۇمىس ماسەلەلەرىنە باسا نازار اۋداردى.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى