ق ر قورعانىس مينيسترلىگى: «ايبىن» جيىنىنا قاتىسۋشىلار العاشقى توزىمدىلىك سىناعىنان ءوتتى - فوتو
جىگىتتەر بەلاعاشتا كۇشتىك جاتتىعۋلاردى ورىنداپ، ال قىزدار جاعى كەشەندى كۇشتىك جاتتىعۋلاردان نورماتيۆ تاپسىردى. سودان كەيىن قاتىسۋشىلار اۆتوماتتى بولشەكتەۋ مەن جيناستىرۋدى كورسەتتى، سوڭىنان اتىس شەبىنە باردى. كوپتەگەن جاستار ءۇشىن گرانات لاقتىرۋ تاعى دا ءبىر سىناق ءتۇرى بولدى. ارينە، بۇل ناعىز جاۋىنگەرلىك سنارياد، شىندىعىندا يميتاتسيا عانا. پوليگوننىڭ جاعدايى مەن جەرتاسادان گرانات لاقتىرۋ كەزىندە تولقىنىس سالدارىنان ازداپ كۇردەلىلىك تۋىندايتىنى راس. دەگەنمەن وسىلاردىڭ بارلىعى - اسكەري قىزمەتشىنىڭ كۇندەلىكتى جاسايتىن جاتتىعۋلارى.
«ايبىن» جيىنىنا قاتىسۋشىلار ءۇشىن ءالى دە بىلە ءتۇسۋدى قاجەت ەتەتىن كاسىپ ءتۇرى ول اسكەري قىزمەت. قاتىسۋشىلاردىڭ وزدەرى اتاپ وتكەندەي، نەگىزگى اسكەري دايارلىقتان وتكەندەرىنە قاراماستان وسىنداي نورماتيۆتەردى تاپسىرۋ ولارعا وڭايعا سوققان جوق. دەگەنمەن، بارلىعى جاقسى شەبەرلىك دەڭگەيىن كورسەتە وتىرىپ، جۇكتەلگەن تاپسىرمانى ءساتتى ورىنداپ شىقتى.
«ايبىن» جاستار جيىنىنىڭ ءبىرىنشى كۇنى ءالى دە اياقتالماعانىن ايتا كەتكەن ءجون. لاگەردىڭ اۋماعىندا قازىر ناعىز كورمە الاڭى جايىلدى. بۇل «مەنىڭ روبوتىم» بايقاۋى. اتالعان بايقاۋ بارىسىندا قاتىسۋشىلار وزدەرىنىڭ روبوت تەحنيكاسىنا قاتىستى ازىرلەگەن كۇتپەگەن تىڭ يدەيالارىن كورسەتەدى. جۋىق ارادا وسىلاردىڭ بىرەۋى قازاقستاندىق ارميانىڭ قارۋ-جاراعى مەن اسكەري تەحنيكا ۇلگىلەرىنىڭ قاتارىنا كىرۋى ابدەن مۇمكىن.
