ريو-دە-جانەيروداعى وليمپيادا نىساندارى مەن جاعاجايلاردا سۋپەرباكتەريا تابىلدى
ولاردىڭ ەسەپتەرىندەگى قورىتىندىلاردى Reuters اگەنتتىگى جازدى.
الىنعان مالىمەتتەرگە سايكەس، برازيليانىڭ ۇلكەندىگى جاعىنان ەكىنشى قالاسىندا كارىز جۇيەسى ءالى دە ەسكى، سونىڭ سالدارىنان كارىز اعىن سۋلارى تازارتىلماستان مۇحيتقا توگىلەدى.
ريو جاعاجايلارىندا جۇرگىزىلگەن سىناقتار وندا ءتۇرلى ميكروبتاردىڭ بار ەكەنىن انىقتادى. سونىڭ اراسىندا انتيبيوتيكتەرگە ءتوزىمدى «سۋپەرباكتەريالار» دا بار. ادەتتە ولاردى اۋرۋعا شالدىققان ادامدار جينالعان ورىنداردان تابۋعا بولادى، ءبىراق ولاردان تىس جەرلەردە بۇل باكتەريالار كەزدەسپەيدى. الايدا ريودا اعىن سۋلاردىڭ كولەمى جوعارى بولعانى سونشالىق، باكتەريالار بۇكىل قالادا، سونىڭ ىشىندە جاعاجايلاردا دا كوپ تارالعان.
ەڭ كوپ زاقىمدالعان جەر - وليمپيادالىق رەگاتالار مەن ۆيندسەرفينگ جارىستارى وتەتىن گۋانابارا شىعاناعىنداعى فلامەنگو جاعاجايى. مۇندا سۋپەرباكتەريالار سىنامالاردىڭ 90 پايىزىندا انىقتالدى. اتاعى كەڭگە جايىلعان يپانەما مەن لەبلون جاعاجايلارىندا بۇل كورسەتكىش 50-60 پايىزى قۇرادى، ال كوپاكابانا جاعاجايى «ەڭ تازا» (10 پايىز) بولىپ شىقتى.
