الماتىلىق نۇرتۋعان اقمىرزايەۆ «جىل دونورى» اتاندى - فوتو
«دونور، سەنىڭ كۇنىڭ!» اتتى اكتسيانىڭ ۇرانى «ەرەسەك بولۋعا مۇمكىندىك بەر - دونور بول» دەپ اتالادى. ول بيىل وسىمەن توعىزىنشى رەت ۇيىمداستىرىلىپ وتىر.
وسى جىلدار ىشىندە اكسيا ءوزىنىڭ تيىمدىلىگىن كورسەتتى. وعان ءار جىلدارى تەك قاراپايىم قازاقستاندىقتار عانا ەمەس، مەملەكەت جانە قوعام قايراتكەرلەرى، ونەر جۇلدىزدارى، سپورتشىلار دا قاتىستى.
ول جىل سايىن 18 -مامىر مەن 14 -ماۋسىم ارالىعىندا وتكىزىلەدى. وسى مەرزىم ىشىندە بارلىق نيەت بىلدىرۋشىلەر جانە تۇراقتى دونورلار قان تاپسىرادى. ال تاپسىرىلعان قان اق قان دەرتىنە شالدىققان بالالاردى ەمدەۋ ءۇشىن الماتى قالاسىنداعى پەدياتريا جانە بالالار حيرۋرگياسى عىلىمي ورتالىعىنا تاپسىرىلادى.
بيىل، شارا اياسىندا تۇڭعىش رەت «جىل دونورى» جۇلدەسى تاعايىندالعان بولاتىن. الماتى قالاسىنىڭ 29 جاستاعى تۇرعىنى نۇرتۋعان اقمىرزايەۆ ونىڭ العاشقى يەگەرى اتاندى.
«مەن سالاماتتى ءومىر سالتىن ۇستانامىن. تەمەكى شەكپەيمىن، اراق ىشپەيمىن. سپورتپەن اينالىسامىن. مەن قان تاپسىرۋدى 2007 -جىلى باستادىم. وسى كۇنگە دەيىن قانشا قان تاپسىرعانىمدى بىلمەيمىن. ءار تاپسىرعاندا 500 مل. تاپسىرامىن. ءبىراق، تەك قان ەمەس، دارىگەرلەردىڭ سۇراۋى بويىنشا پلازما، ترومبوتسيت تاپسىرىپ تۇرامىن. قان تاپسىرۋ مەن ءۇشىن ادەتكە اينالعان. ءار ەكى اي سايىن تاپسىرىپ تۇرامىن. تاپسىرماسام مازاسىزدانا باستايمىن. مەنىڭ ءىنىم دە دونور. بارلىق ازاماتتاردى قان تاپسىرۋعا شاقىرامىن. بۇل قاۋىپسىز ءارى پايدالى»، - دەدى ن. اقمىرزايەۆ.
شارانىڭ ارنايى قوناعى رەتىندە قان تاپسىرۋ سانى بويىنشا الەمدەگى ەكىنشى رەكوردشى- دونور - الماتى قالاسىنىڭ تۇرعىنى الەكساندر سكاكوۆسكيي شاقىرىلدى. ول كۇنى بۇگىنگە دەيىن 1038 رەت قان تاپسىرىپتى. تاپسىرعان قانىنىڭ مولشەرى كۇنى بۇگىنگە دەيىن 520 ليتردەن اسقان. بيىل 69 جاسقا تولعان الەكساندر نيكولايەۆيچ اپتا سايىن قان تاپسىرادى. ايتا كەتەلىك، ءقازىر قان تاپسىرۋ بويىنشا الەم بويىنشا رەكوردسمەن دونور اۆستراليالىق دجەيمس حارريسون ەكەن. ول بيىل 81 جاسقا تولعان. قان تاپسىرۋ ءوتىلى - 63 جىل. ال الەكساندر نيكولايەۆيچ بولسا 1971 -جىلدان بەرى دونور.
بۇگىن دونورلار اراسىندا بەلگىلى تۇلعالار دا بولدى. ءانشى ينديرا ەلەمەسوۆا بۇگىنگى اكتسياعا ءبىرىنشى رەت قاتىستى. ول ەندى تۇراقتى تۇردە قان تاپسىرىپ تۇرۋعا نيەت ءبىلدىردى.
رەسپۋبليكالىق قان ورتالىعى مامانداردىڭ ايتۋىنشا، قازاقستاندا تەگىن قان بەرۋشىلەردىڭ سانى بۇگىندە 65 پايىزعا ۇلعايدى. جىل سايىنعا ءوسىم - 3 پايىزدى قۇرايدى. 2014-2016 -جىل ارالىعىندا قازاقستاندا تەگىن دونورلاردىڭ سانى 216000 ادامنان 226910 ادامعا ارتقان.
اۆتور: ايبوتا جاپپاربەرگەن
