كيىكتىڭ نەدەن قىرىلعانىن جاريا ەتۋ ءۇشىن اۋىل شارۋاشىلىعى مينيسترلىگى عالىمداردىڭ جاۋابىن كۇتىپ وتىر

اۋرۋدىڭ شىعۋىنا نە سەبەپ بولعانىن ءبىزدىڭ وتاندىق جانە شەتەلدىك عالىمدار ناقتى ايتا الماي وتىر، دەيدى ا ش م جانۋارلار دۇنيەسى جانە اڭشىلىق شارۋاشىلىعى باسقارماسىنىڭ باسشىسى باقىتبەك دۇيسەكەيەۆ.

«بىلتىر كيىكتەردىڭ جاپپاي قىرىلۋى - قورعاۋ جۇمىستارىنىڭ ناشار بولعانىنان ەمەس، اۋرۋدىڭ باستالعانىنان بولدى. اۋرۋدىڭ شىعۋىنا نە سەبەپ بولعانىن ءبىزدىڭ وتاندىق جانە شەتەلدىك عالىمدار دا ناقتى ايتا الماي وتىر»، - دەيدى ب. دۇيسەكەيەۆ.

ياعني، ازىرگە، كيىكتەر پاستەرەللەز اۋرۋىنان قىرىلدى دەگەن نۇسقا ساقتالادى.

ب. دۇيسەكەيەۆتىڭ ايتۋىنشا، كيىكتەردىڭ نەدەن قىرىلعانىن انىقتايتىن - ق ر ءبىلىم جانە عىلىم مينيسترلىگىنىڭ عالىمدارى.

«ءبىلىم جانە عىلىم مينيسترلىگى بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتى «2012-2014 -جىلدارعا ارنالعان پروفيلاكتيكالىق تاسىلدەردى ازىرلەۋ جانە ق ر اۋماعىندا مەكەندەيتىن كيىكتەر پوپۋلياتسياسىنىڭ جۇقپالى اۋرۋلارىنىڭ اينالىمىن مونيتورينگتەۋ بويىنشا عىلىمي- تەحنيكالىق باعدارلامانى» جۇزەگە اسىرعان. باعدارلامانىڭ بيۋدجەتى 300 ميلليون تەڭگە دەپ وتىرسىزدار (...). ءبىراق، اۋىل شارۋاشىلىعى مينيسترلىگى بۇل باعدارلاماعا تاپسىرىس بەرگەن جوق. ياعني، بيۋدجەتى دە ءبىلىم جانە عىلىم مينيسترلىگىنىكى، سايكەسىنشە، باعدارلاماعا بولىنگەن بيۋدجەتتىڭ ناتيجەسى تۋرالى دا ءبىلىم جانە عىلىم مينيسترلىگى ەسەپ بەرەدى. ولاردىڭ بىزگە ايتقانى - وسى باعدارلاما اياسىندا پاستەرەللەزگە قارسى ۆاكتسينا جاسالعان. ءبىراق، ۆاكتسينانى دالادا پايدالانۋ ءۇشىن ءبىراز ۋاقىت كەرەك. ياعني، ۆاكتسينانى اپروباتسيادان وتكىزۋ ءۇشىن زاڭ بويىنشا ەكى جىل ۋاقىت كەرەك»، - دەدى ب. دۇيسەكەيەۆ.

اۆتور: كەنجەكەي توقتامۇرات قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى