مينيستر قازاقستاندا ۇيالى تەلەفونداردىڭ ۇرلىعىن جىل سوڭىنا دەيىن شەشۋگە ۋادە ەتتى

«ەلىمىزدە جاسالاتىن بارلىق قىلمىستاردىڭ 60-63 پايىزى - ۇرلىق. ۇرلىقتىڭ 25-27 پايىزى ۇيالى تەلەفوندارعا قاتىستى بولىپ وتىر. ءبىز ءۇشىن ۇيالى تەلەفونداردىڭ ۇرلىعى وتە ۇلكەن ماسەلەگە اينالدى. كوپتەگەن ەلدەردە ەگەر تەلەفون ۇرلاناتىن بولسا، بۇعاتتاپ تاستايدى. دەمەك، ونى ۇرلاۋدىڭ ءوزى قيسىنسىز. سوندىقتان ا ق ش- تا ۇيالى تەلەفون ۇرلىعى مۇلدەم جوق دەسە دە بولادى. تەلەفون تاۋىپ السا، بىردەن قايتارىپ بەرەدى.

نەگە ءبىز دە سولاي ىستەي المايمىز؟! سەبەبى ءبىزدىڭ ەلگە كونترافاكتىلىك تەلەفوندار وتە كوپ ەنىپ كەتتى. سول سەبەپتى ەگەر ۇيالى تەلەفون ۇرلانعان كەزدە، پوليتسەيلەر ونىڭ IMEI- كودى ارقىلى بۇعاتتاسا، بىردەن 50-100 كونترافاكتىلىك جولمەن كەلگەن تەلەفون بۇعاتتالىپ قالادى»، - دەپ اتاپ ءوتتى ق. قاسىموۆ.

ءمينيستردىڭ ايتۋىنشا، ول ءۇشىن قازاقستان ۇيالى تەلەفوندار نارىعىن رەتكە كەلتىرۋى ءتيىس.

«ۇرلىقپەن ءتيىمدى كۇرەسۋ ءۇشىن، ۇيالى تەلەفونداردىڭ زاڭسىز ەلگە كەلۋىن دوعارۋ قاجەت. ۇيالى وپەراتورلار ولارعا قىزمەت كورسەتۋدەن باس تارتسىن. ا ق ش- تاعى سياقتى ۇيالى تەلەفونداردىڭ بارلىعى جەكە تۇلعاعا تىركەلۋى ءتيىس. كونترافاكتىلىك تەلەفونداردى انىقتاۋ ءۇشىن ءبىز ءار تەلەفونعا ءتورت ساننان تۇراتىن ج س ن بەرەمىز. ءبىزدىڭ ارنايى قىزمەت ۇيالى تەلەفونداردى جەكە تۇلعاعا تىركەۋگە بولاتىنداي ەتىپ جاساي الادى»، - دەدى ول.

ونىڭ ايتۋىنشا، تەك تىركەلگەن تەلەفوندى عانا قاشىقتىقتان بۇعاتتاۋعا بولادى. قازىرگى ۋاقىتتا الماتىدا 200 مىڭ ۇرلانعان تەلەفون بۇعاتتالعان. مينيستر ۇيالى تەلەفونداردىڭ ۇرلىعىن جىل سوڭىنا دەيىن شەشۋگە ۋادە ەتتى.

اۆتور: جاسۇلان جولدىبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى