ساراپشىلار قىرعىز تۋريزمىنىڭ تىعىرىققا تىرەلگەنىنە الاڭداۋشىلىق بىلدىرەدى - فوتو
ساراپشىلار بۇل ولقىلىققا قاتىستى باستى ەكى سەبەپتى العا تارتادى: ءبىرىنشى - جاڭعىرتۋ جۇمىستارىنىڭ كەش باستالۋى. ونىڭ سالدارىنان بالىقشى قالاسىنان شولپان اتا قالاسىنا دەيىنگى ارالىقتاعى ونسىز دا اپاتتى سانالاتىن ەكىجولاقتى تار جولدا قوزعالىس مۇلدەم قاڭتارىلعان. ەكىنشى سەبەپ - پانسيوناتتار مەن دەمالىس ۇيلەرىندەگى باعانىڭ ورىنسىز كوتەرىلۋى، ءتىپتى ساراپشىلار مۇنداعى سەرۆيستىڭ تومەندىلىگىن ايتىپ، باعانىڭ وعان ساي ەمەس ەكەنىن العا تارتادى.
قىرعىزدىڭ تۋريزم جونىندەگى تانىمال ساراپشىسى داۆران وسمانقۇلوۆتىڭ ايتۋىنشا، ۇكىمەت ونسىز دا كەرى كەتە باستاعان جول قۇرىلىسىن توقتاتا تۇرۋ شەشىمىن ورىنسىز قابىلداپ، جىعىلعانعا جۇدىرىق جاساعان. «پروتسەسستى نەگە توقتاتتى؟ قازىر جۇمىس ءجۇرىپ جاتىر، ءبىراق تىم باياۋ. جاڭعىرتۋ جۇمىستارىن تامىزدىڭ سوڭىنا تامان اياقتايمىز دەيدى، ودان كەلەر پايدا نە؟ ءبارى «كوشپەندىلەردىڭ الەمدىك ويىندارى» ءۇشىن جاسالىپ جاتىر. سوندا قاتارداعى تۋريستەر نە ىستەيدى؟ الەمدىك تاجىريبە سپورتتىق جارىستاردىڭ ينۆەستيتسيا تارتۋعا ءتيىمدى قۇرال ەكەنىن، ونىڭ ەڭ قۇرىعاندا كوممەرتسيالىق تۇرعىدان ءتيىمدى ەكەنىن كورسەتەدى. ال بىزدە ءتىپتى پرومو- روليك تە دايىن ەمەس»، - دەيدى داۆران وسمونقۋلوۆ.
ونىڭ ايتۋىنا قاراعاندا، باعا مەن ساپاعا قاتىستى ماسەلە دە ءالى جاقسارتۋدى قاجەت ەتەدى. «بۇل عانا ەمەس، ءبىز كولىمىزدى، وزەندەرىمىزدى ساقتاي الماي وتىرمىز، تابيعات، قورشاعان ورتا دا قامقورلىق تىلەيدى. قازىر شەنەۋنىكتەردەن گورى قاراپايىم حالىق وسىعان قاتىستى كوپ نارسەلەر ىستەپ جاتىر. ءتىپتى تۋريستەر مەملەكەتكە قاراعاندا كوپ ۇلەس قوسۋدا. ولاردىڭ تۇسىرگەن روليگىنىڭ ءوزى نە تۇرادى؟! ال قازىرشە ءبىز تۋريستەردەن ۋاقىتشا قولايسىزدىقتار ءۇشىن كەشىرىم سۇراپ، ىستىقكولدەن كەرەمەت كوڭىل كۇيمەن قايتۋىن عانا تىلەيمىز»، - دەدى د. وسمونكۋلوۆ.
اۆتور: قانات مامەتقازى ۇلى
