داۋلەتكەرەي كاپ ۇلى: شىن مانىندە، ءوز باۋىرىمىزدى ولتىردىك
كەشە قازاق ەدى عوي، الاياقتارعا ەردى، سالافي (پسيەۆدو سالافي) بولدى، سوسىن ءبىراق-اق كۇندە تەرروريسكە اينالىپ شىعا كەلدى. ءوز قانىن، ءوز قاعىنان شىققان قازاعىن قولى قالتىراماستان ولتىرە سالدى. اتتى، باۋىزدادى. ءوز مەملەكەتىنە قارسى شىقتى. دەمەك، كەز كەلگەن سالافيت، كەز كەلگەن ۋاقىتتا تەرروريسكە اينالا الادى دەگەن تۇجىرىم جاساۋعا ابدەن بولادى.
سوڭعى تەرروريستى ولتىردىك دەپ قۋانىپ جاتىرمىز... شىن مانىندە، ءوز باۋىرىمىزدى ولتىردىك. قىناداي قىرىلعانداردىڭ ءبارى قىرشىنداي جاس. قايداعى جوق بىرەۋلەردىڭ ازعىرۋىنا ءتۇستى، اجال قۇشتى. اۋلەتى بولسا، قارا بەت بولىپ قالا بەردى... ۇلتتىق تراگەديا!
ءبىزدىڭ شەكەمىزدىڭ قىزارىپ جۇرگەنى دە سول. يدەولوگيا! جات يدەولوگيا! سالافيزم ءدىن ەمەس، ساياسي يدەولوگيا! ايتپەسە، يسلام عانا ەمەس، كەز كەلگەن دىندە ادامعا قيانات جاساۋ تۋرالى ءبىر اۋىز ءسوز تابا المايسىز.
ادامزات تاريحىندا سان ءتۇرلى يدەولوگيا ءۇشىن وسى ۋاقىتقا شەيىن ميلليونداردىڭ قانى قىپ-قىزىل تەڭىز بولىپ اقتى. ەڭ ۇلكەن سوعىستاردىڭ كوبى يدەولوگيا ءۇشىن بولدى. سول ءۇشىن اعا ىنىگە قارسى كەلدى، بالا اكەنى ءولتىردى. سالافيزم ءبىزدىڭ قوعامعا سىنالاپ ەنىپ بارادى. قازاق قوعامى ونى قابىلداۋ ءۇشىن بايىرعى سالت-داستۇرىنەن باس تارتۋ كەرەك.
جو، جوق، ول مۇمكىن ەمەس! سوندىقتان ءبىز «اتا-بابالارىمىز كاپىر بولىپتى، اداسىپ كەلىپتى»، - دەپ وتكەنگە مۇسىركەي، جيىركەنىشپەن قارامايمىز. وتكەن تاريحىمىزعا، بابالارىمىزدان قالعان اسىل مۇراعا ماقتانمەن قارايمىز.
بۇل يدەولوگيا وتە قاۋىپتى. قانشاما ەلدى ىشتەن ءىرىتىپ، قۇردىمعا جونەلتتى. بۇلاردىڭ ارتىندا ۇلكەن كۇش بار، ۇلكەن قارجى بار. ات توبەلىندەي از عانا توپ سولاردىڭ قىزىعىن كورىپ، ميسسيونەرلىك دۇرىسى - وتانعا ساتقىندىق جاساپ كەلەدى.
تۇتاس حالىقتى سوڭىنان ەرتىپ ازدىرىپ، قىرعىنعا يتەرمەلەپ، قالىڭ قازاقتى ءبىر-بىرىنە قارسى قويىپ وتىر. ناتيجەسى مىنە، سيرياعا، تاياۋ شىعىسقا بارىپ قىرىلعان جاستار، ءوز ەلىمىزدى ءوز باۋىرلارىن باۋداي ءتۇسىرىپ، باۋىزدايتىن قانىپەزەرلەر پايدا بولدى. وسى جولدا قۇربان بولعانداردىڭ ءبارىنىڭ قانى ات توبەلىندەي وسىلاردىڭ مويىنىندا.
جۇرەكتى اۋىرتاتىن تراگەديا دا وسى. تەرىس ءدىننىڭ جەتەگىندە كەتكەن تالاي جاس اتا-اناسىنىڭ ىستەگەن تاماعىن جەمەگەنى بىلاي تۇرسىن، ولاردى ۇرىپ-سوعىپ، «كاپىرسىڭ» دەپ ۇيىنەن ايداپ شىعىپ جاتقانىن دا كورىپ وتىرمىز. اسىرەسە، باتىس وڭىرلەردە.
ءبىز جات يدەولوگياعا جول بەرمەيمىز! قازاقتىڭ قاسيەتتى توپىراعىندا ساياسيلانعان سالافيلىكتىڭ دانەگىنىڭ وسۋىنە قارسىمىز. ءوز قۇندىلىعىمىزعا قارسى شىعاتىن جاستار ءوسىرىپ، سولاردىڭ قولىمەن ءداستۇرىمىزدىڭ تامىرىنا بالتا شابۋعا رۇقسات ەتپەيمىز. قازاقستاندا ءومىر سۇرگىڭىز كەلمەسە، جەرگىلىكتى بيلىككە، ءدىن باسىلارىنا باعىنعىڭىز كەلمەسە، ءابۋ-حانيفا ءمازھابىنا مويىنسۇنعىڭىز كەلمەسە، مارحابات، ارابستانعا بارىڭىز. ايتپەسە، التى الاشتىڭ اشۋىن ابدەن تاسىتىپ، شامىنا ءتيىپ بولدىڭىزدار.
مەن بەيبىت ەلدە ءومىر سۇرگىم كەلەدى. ءبىز سان عاسىر اڭساعان ماڭگىلىك ەلدى قۇرعىمىز كەلەدى. ءوزىمنىڭ تەرەڭ تاريحىممەن قۋاتتانىپ، ساف التىنداي سالت-ءداستۇرىمدى ۇرپاعىما ونەگە ەتكىم كەلەدى. تەكتىلىگىمدى ولسەم دە «ارابتىققا» ايىرباستامايمىن!
adebiportal.kz
