ۋفادا «ورال- التاي: عاسىرلاردان بولاشاققا» اتتى جيىن ءوتتى

اكادەميانىڭ باسپا ءسوز قىزمەتىنىڭ حابارلاۋىنشا، باشقۇرتستان رەسپۋبليكاسى عىلىم اكادەمياسى ۇيىمداستىرعان كورنەكتى تۇركىتانۋشى عالىم ەدحيام تەنيشيەۆتىڭ 95-جىلدىعىنا ورايلاستىرىلعان «رەسەي حالىقتارى تىلدەرىنىڭ ديالەكتولوگياسىنداعى وزەكتى پروبلەمالارى» بۇكىل رەسەيلىك عىلىمي كونفەرەنسياسى وسىمەن VII رەت ۇيىمداستىرىلىپ وتىر.

VII بۇكىل رەسەيلىك عىلىمي كونفەرەنسيانىڭ اشىلۋ سالتاناتىندا اكادەميا قىزمەتكەرى ءا. ابايەۆا TWESCO باسشىسى دارحان قىدىرالىنىڭ ارنايى قۇتتىقتاۋ حاتىن وقىپ بەردى. بۇدان بولەك، پلەنارلى وتىرىستا ر ع ا ۋفا عىلىم ورتالىعى پرەزيديۋمىنىڭ ءتوراعاسى ۋسەين دجەميليەۆ پەن باشقۇرتستان رەسپۋبليكاسى عىلىم اكادەمياسىنىڭ پرەزيدەنتى الفيس گايازوۆ قۇتتىقتاۋ ءسوز سويلەپ، قاتىسۋشىلارعا ساتتىلىك تىلەدى.

عىلىمي جيىنداردا قازاقستان، وزبەكستان، تاتارستاننان جانە رەسەيدىڭ وزگە وڭىرلەرىنەن كەلگەن عالىمدار تۇركىتانۋدىڭ كوكەيتەستى ماسەلەلەرىن ورتاعا سالىپ، باياندامالار جاسادى. قوس كونفەرەنسيانىڭ قورىتىندىسى بويىنشا ارنايى رەزوليۋتسيالار قابىلداندى.

 ايتا كەتۋ كەرەك، ەدگەم راحيموۆيچ تەنيشيەۆ - 1921 - جىلى دۇنيەگە كەلگەن رەسەيلىك تۇركىتانۋشى عالىم. رەسەي عىلىم اكادەمياسىنىڭ ءتىل بىلىمدەرى ينستيتۋتىنىڭ ورال- التاي تىلدەرى ءبولىمىن باسقارعان، سونىمەن قاتار «سوۆەتتىك تۇركولوگيا» جۋرنالىنىڭ باس رەداكتورى بولعان. «تۇركى تىلدەرىنىڭ سالىستىرمالى- تاريحي گرامماتيكاسى» اتتى كوپ تومدىق باسىلىم 2004 - جىلى ومىردەن وزعان ەدگەم تەنيشيەۆتىڭ باس رەداكتورلىعىمەن جارىق كورگەن. جالپى 60-تان استام عىلىمي مۇرا قالدىرعان عالىم «كونە تۇركى سوزدىگىن» قۇراستىرۋشىلاردىڭ ءبىرى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى