نازاربايەۆ ۋنيۆەرسيتەتىندە وقيتىن ءاربىر ستۋدەنتكە بيۋدجەتتەن قانشا قاراجات بولىنەدى؟
بۇل جونىندە قازاقستان پرەزيدەنتى نازاربايەۆ ۋنيۆەرسيتەتىنىڭ تۇلەكتەرىنە ديپلوم بەرۋ سالتاناتى بارىسىندا ايتتى، - دەپ حابارلايدى Tengrinews.kz.
«ۋنيۆەرسيتەتتە وقۋ تەگىن، سىزدەر وسىنى تۇسىنىڭىزدەر. الەمدە بىردە-ءبىر ۋنيۆەرسيتەت مەملەكەتتىك قاراجاتى ەسەبىنەن وقىتپايدى. بارلىعى ستۋدەنتتەر مەن ولاردىڭ اتا-انالارىنىڭ اقشاسىنا وقىتادى. باكالاۆريات باعدارلاماسى بويىنشا نازاربايەۆ ۋنيۆەرسيتەتىندە وقيتىن ءاربىر ستۋدەنتكە 4 جىلدا 87 مىڭ، ال ماگيستراتۋراعا 36 مىڭ دوللار بولىنەدى. بۇل شىعىندى مەملەكەت وتەپ وتىر، سەبەبى، ءبىز سياقتى جاس مەملەكەتكە كادرلار كەرەك»، - دەدى نازاربايەۆ.
ايتا كەتەيىك، نازاربايەۆ ۋنيۆەرسيتەتى پرەزيدەنتتىڭ باستاماسىمەن 2010-جىلى قۇرىلدى. بيىل ۋنيۆەرسيتەتتىڭ تۇلەكتەر سانى 622 گە جەتتى، ولاردىڭ 444 ءى باكالاۆر، ال 178 ءى ماگيسترلەر.
