قارا جامىلعان اقتوبەنىڭ بۇگىنگى جايى - فوتو
ءىرى لاڭكەستىك وقيعالاردان كەيىن قالا تۇرعىندارىمەن تىلدەسكەن NUR. KZ ءتىلشىسى ولاردىڭ قورقىنىش-ۇرەيى تۋرالى ءبىلىپ قايتتى.
ەل قابىرعاسىن قايىستىرعان 2016 تەراكت وقيعاسى حالىقتى ەسەڭگىرەتىپ تاستادى. «قاۋىپ قايدان كەلدى، نە ءۇشىن جاسالدى؟» دەگەن سۇراقتار ءتۇرلى بولجامدار جاساپ جاتىر. ءبىرى «حاليفات مەملەكەتىن ارمانداۋشىلاردىڭ ارەكەتى» دەسە، ەكىنشى وي «نۇكتەسى قويىلماعان 2011 وقيعاسىنىڭ جالعاسى، كەك الۋ» دەيدى.
«ەكسترەميزممەن سوتتالىپ كەتكەندەردى قۇتقارۋ ءۇشىن جاسالىنعان ارەكەتتەر ەكەن» دەگەن ويلار دا بار.
قالاي دەسەك تە، بەيبىت جاتقان ەلدە تەراكت وقيعاسى بولدى. بىردەن اسكەري بولىمگە شابۋىل جاسالىندى. ۇلتتىق ۇلان ساربازدارىن ساناۋلى ادام ءبىر ساتتە تاس-تالقان ەتتى. ون مينۋتتا ەل قورعايمىن دەپ وتىرعان ساربازداردىڭ استان-كەستەڭىن شىعاردى. اسكەري بولىمشەنىڭ كەز-كەلگەنگە اشىلا بەرمەيتىن باس قاقپاسىن قاق جارىپ كىرگەندەر ارتىنان شىققان. كوشە اسىپ، ارتىنداعى ساياجايلاردا بوي تاسالاعان ولاردى كومەكشى كۇش تابا الماي قالدى.
قارۋ جاراق دۇكەندەرىندە بولعان جاعداي دا وسىنى قايتالادى. كۇزەت قىزمەتكەرلەرى وققا ۇشىپ، بەيبىت حالىق زارداپ شەكتى. لاڭكەستەر پوليتسيا قىزمەتكەرلەرىنىڭ كولىگىن ايداپ كەتتى.
بۇل تاعى دا قۇقىق قورعاۋ قىزمەتكەرلەرىنىڭ قامسىز ارەكەتىن، توسىننان جاسالاتىن شابۋىلعا دايىن ەمەس ەكەنىن كورسەتتى.
حالىق زيالىلارى سابىرعا شاقىرىپ جاتىر. بيلىككە قىرىلىپ جاتقاندار قاراكوز باۋىرلارىمىز ەكەنىن ەسكەرتۋدە. ساياساتكەر امانگەلدى ايتالى بيلىككە «جەڭدىك» دەپ ايتۋدىڭ ەرتە، تەك سايابىرسۋ ەكەنىن ەسكەرتتى. بولعان جايدى وي ەلەگىنەن وتكىزىپ، ونى شەشۋدىڭ جولىن ىزدەۋ كەرەكتىگىن ايتتى.
اقتوبە حالقىنىڭ ۇرەيمەن وتىرعانىنا بەس كۇن بولدى. كوشەدە حالىق قاراسى دا از. «قاي جاعىمنان كەلىپ اتىپ كەتەدى» دەگەندەر ەسىگى مەن تەرەزەسىن قىمتاپ، ۇيلەرىندە تىعىلىپ وتىر. «انا جەر، مىنا جەردە اتىس بولىپ جاتىر» دەگەن اڭگىمە كوپ. جەرگىلىكتى قۇقىق قورعاۋ قىزمەتكەرلەرى ناقتى اقپارات بەرۋدەن باس تارتىپ وتىر. ال يمامدار ءتۇسىندىرۋ جۇمىستارىن جاساۋدىڭ ورنىنا جۋرناليستەردەن قاشىپ الەك.
جاستاردا ۇرەي جوق. كينو قاراپ جۇرگەندەي. «اتىس بولىپ جاتىر» دەگەن جاققا تۇرا جۇگىرىپ، قىزىق قاراپ ءجۇر.
اقتوبەدەگى بارلىق نىساندار باقىلاۋدا تۇر. اۋرۋحانالاردىڭ اينالاسى تولعان قارۋلى كۇزەت. شابۋىل جاسالىنعان اسكەري بولىمشەگە بارار جول ۇلكەن اۆتوبۋستارمەن جابىلعان. قالاعا كىرەتىن، شىعاتىن جولداردىڭ بارلىعىنا ۇلكەن ماشينالار قويىلىپ، پوليتسيا قىزمەتكەرلەرى قاپشىقتارمەن قورعانىپ تۇر.
ەل قازا بولعانداردى ەسكە الىپ جاتىر. بالالارىنىڭ تەراكت جاساعانىن ەستىگەن لاڭكەستەردىڭ وتباسىلارى دا قان جىلاپ كەشىرىم سۇرايدى. ولاردىڭ اراسىندا جاعدايى كەتىپ تۇرعان جاتاقحانالاردى پانالاپ جۇرگەندەرىنىڭ بار ەكەنىن كوردىك.
كۇدىكتى ارسەن تاڭاتوروۆتىڭ ءۇيى
حالىق بيلىكتەن قارا جامىلعان قىزداردى كوشەدە جۇرگىزبەۋىن سۇرايدى. اقتوبەدە ءدىني احۋالدىڭ جاقسى ەمەس ەكەندىگى ءجيى ايتىلادى. قالانىڭ باس ۇستازى 70 مەكتەپتە 130 وقۋشىنىڭ ورامال تاعىپ باراتىنىن ايتتى. وبلىستىڭ باس دارىگەرى 2132 بالا ەكپە جاساتپاعانداردىڭ تىزىمىندە تۇر. ولاردىڭ 1247 ءى مۇلدە ەكپە الماعانىن ەسكەرتتى.
«وتكەن جىلى باسقا اعىمدا جۇرگەن 800 دەن اسا جاماعاتپەن جەكە كەزدەسۋ وتكىزدىك، ولاردىڭ 286 سى كوزقاراسىن وزگەرتتى. شەتەلگە جاستاردىڭ كەتۋى ۇلكەن ماسەلە بولىپ تۇر. سيريا ماسەلەسىنەن بولەك، شەتەلگە تەولوگيالىق ءبىلىم الۋ ءۇشىن شىققىسى كەلەتىندەر بار»، - دەپ ءدىن ىستەر باسقارماسىنىڭ باسشىسى باۋىرجان ەسماحاننىڭ ءوزى ايتقان ەدى.
اقتوبەدە باسقا اعىمدا جۇرگەن 2000 نان اسا ادامنىڭ بار ەكەنى ب ا ق بەتىندە جاريالاندى.
«2011-جىلدى ەستەن شىعارماۋ كەرەك» دەپ شەنەۋنىكتەر ءجيى ەسكە الاتىن شۇبارشي وقيعاسىن دا ەشكىم ۇمىتقان جوق.
سول جىلى 17- مامىر كۇنى ۇ ق ك عيماراتىندا جارىلىس بولىپ، عيماراتقا كەلگەن جانكەشتى ەسىك الدىندا ءوزىن جارىپ جىبەرگەن ەدى. ال شۇبارشي وقيعاسى 30- ماۋسىمنان 1- شىلدەگە قاراعان ءتۇنى باستالدى.
قارا جامىلعان حالىق ەرتەڭگى كۇنگە قورقىنىشپەن قارايدى.
