نازاربايەۆ ۋنيۆەرسيتەتىنىڭ تۇلەكتەرى ەلىمىزدىڭ جارقىن بولاشاعى جولىندا ايانباي قىزمەت ەتۋى قاجەت - ەلباسى

بۇل تۋرالى بۇگىن نازاربايەۆ ۋنيۆەرسيتەتى تۇلەكتەرىنىڭ ەكىنشى سالتاناتتى وقۋ ءبىتىرۋ راسىمىندە ءسوز سويلەگەن ەلباسى نۇرسۇلتان نازاربايەۆ ايتتى.

«ءبىز زاماننىڭ قيىندىقتارىنا قاراماي، ەكونوميكانىڭ قيىندىقتارىنا قاراماي سەندەردىڭ الاڭسىز ءبىلىم الىپ، قاۋىپسىز ءومىر سۇرۋلەرىڭ ءۇشىن بارلىق جاعدايدى جاساپ كەلەمىز. قازاقستاننىڭ 2050-جىلعا دەيىنگى ستراتەگياسى، ۇلت جوسپارى، نۇرلى جول باعدارلاماسى، جاڭا ەكونوميكالىق ساياسات - ەلىمىزدىڭ ءوسىپ-وركەندەگەن 30 مەملەكەتتىڭ قاتارىنا كىرۋى ءۇشىن جاسالىپ وتىر. بۇل سەندەردىڭ ناعىز كەمەلدەنگەن كەزدەرىڭدە بولاتىن جاعداي. وسىنى بىرگە قۇرۋلارىڭ كەرەك. سەندەر دە ەلىمىزدىڭ جارقىن بولاشاعى جولىندا ايانباي قىزمەت ەتۋلەرىڭ، بارشا جاستارعا ۇلگى بولۋلارىڭ قاجەت»، - دەگەن مەملەكەت باسشىسى تۇلەكتەرگە ءسات ساپار بىلەدى.

سونىمەن قاتار ەلباسى «بولاشاق» باعدارلاماسىن اشىپ، بىرنەشە مىڭ جاسىمىزدى شەتەلدىك ۇزدىك وقۋ ورىندارىندا ءبىلىم الۋعا جاعداي جاساعاندىعىن اتاپ ءوتتى. بۇگىندە ولاردىڭ 10 مىڭنان استام ەلگە ورالىپ، ەل ەكونوميكاسىن كوتەرۋگە اتسالىسىپ جۇرگەندەرىن ايتتى.

«سەندەر ءبىزدىڭ تاۋەلسىزدىگىمىزدىڭ ۇياسىنان ۇشقان ۇرپاقسىڭدار. مەنىڭ قولىمنان ۇشقان ۇرپاقسىڭدار. سول ءۇشىن مەملەكەتتىڭ وسى قامقورلىعىن باعالاپ، جان اياماي ەلدەرىڭىزگە قىزمەت ەتەسىڭدەر دەپ سەنەمىن. قازاقستاننىڭ كوك تۋىن اسپاننان جەلبىرەتىپ، تىك ۇستاپ، بولاشاقتا ەلدىڭ ابرويىن اسقاقتاتا بەرەدى دەپ سەنەمىن»، - دەدى ن. نازاربايەۆ.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى