باكۋدە ق ر ەلشىلىگى جانىنداعى قازاقستان دوستارى كلۋبىنىڭ ءبىرىنشى وتىرىسى ءوتتى
بەيرەسمي كەزدەسۋگە ازەربايجاننىڭ تانىمال قوعام قايراتكەرلەرى، عىلىمي زيالى قاۋىم، ازەربايجاننىڭ جەتەكشى ب ا ق وكىلدەرى، ساراپشىلار، سونداي-اق گ. اليەۆ اتىنداعى «قازاقستان-ازەربايجان» دوستىق قوعامىنىڭ مۇشەلەرى قاتىستى.
كلۋبتى قۇرا وتىرىپ، ەلشىلىك ءوز الدىنا قازاقستانعا بەي-جاي قارامايتىن ازەربايجان ازاماتتارى ىشىنەن باستاماشىل ادامداردى ءبىر قوعامداستىققا بىرىكتىرۋ ماقساتىن العا قويدى. سونىمەن بىرگە، كلۋب الدىندا تۇرعان ماڭىزدى مىندەت ازەربايجان جۇرتشىلىعىنا قازىرگى قازاقستان تۋرالى تولىق جانە شىنايى اقپاراتتاردى جەتكىزۋ، سونداي-اق باۋىرلاس ەلدەر اراسىنداعى ەكىجاقتى قاتىناستاردى نىعايتۋ ءۇشىن بىرلەسكەن شارالاردى ۇيىمداستىرۋ بولماق.
وتىرىستى اشا وتىرىپ، ەلشى بەيبىت يسابايەۆ قازىرگى قازاقستاننىڭ ومىرىندەگى سوڭعى وقيعالارعا توقتالدى، سونىڭ ىشىندە استانا ەكونوميكالىق فورۋمى، ەۋرازيالىق مەديافورۋم، «دىندەر لاڭكەستىككە قارسى» حالىقارالىق كونفەرەنتسياسى جونىندە اقپاراتتار بەردى. ۆاشينگىتون قالاسىندا اعىمداعى جىلعى ناۋرىز ايىندا تانىستىرىلىمى وتكەن ق ر پرەزيدەنتى ن. نازاربايەۆتىڭ «الەم. ХХІعاسىر» مانيفەسىنە باسا كوڭىل ءبولىندى. ەلىمىزدىڭ كوپ ۇلتتى سيپاتىن ەسكەرە وتىرىپ، قازاقستان حالقى اسسامبلەياسى جانە «ماڭگىلىك ەل» ۇلتتىق يدەياسى ماڭىزدى ورىن الادى، كلۋب مۇشەلەرى كەزدەسۋ بارىسىندا وسى ماسەلەلەر جونىندە وي ءبولىستى.
ەلشى ب. يسابايەۆ ءبىزدىڭ ەلدەرىمىز اراسىنداعى سەنىمنىڭ جوعارى دەڭگەيىن جانە ءوزارا قۇرمەتتى ەسكەرە وتىرىپ، تولعاندىراتىن ماسەلەلەردى ىلگەرى جىلجىتۋ ءۇشىن كۇش-جىگەردى كۇشەيتۋدىڭ جانە ەكىجاقتى قاتىناستاردى نىعايتا ءتۇسۋ ءۇشىن قوعامدار اراسىنداعى ديالوگتى ورىستەتۋدىڭ قاجەتتىگىن اتاپ ءوتتى. ءسويتىپ، دوستار كلۋبى عىلىمي، مادەني، ادەبي جانە باسقا دا جوبالار ارقىلى قازاقستان مەن ازەربايجان حالىقتارى اراسىنداعى ىنتىماقتاستىقتى نىعايتۋدا «التىن كوپىر» بولماق.
شارا قورىتىندىسىمەن كلۋب جۇمىسىنىڭ پەرسپەكتيۆالارى، كىتاپ باسۋ، شىعارماشىلىق كەشتەر، كورمەلەر، سەمينارلار جانە باسقالارىن ۇيىمداستىرۋ تۇرىندە بىرلەسكەن ىقتيمال جوبالار تۋرالى پىكىر الماستى. بارلىق قاتىسۋشىلار قازاقستان دوستارى كلۋبىنىڭ كەزدەسۋلەرىن تۇراقتى وتكىزۋ جونىندە ءبىراۋىزدى ۇستانىمدارىن ءبىلدىردى، سونداي-اق باۋىرلاس ەلدەر اراسىنداعى دوستىق قاتىناستار يگىلىگى جولىنداعى جۇمىسقا ءازىر ەكەندىكتەرىن قۋاتتادى.
