دينا مەن سەيتەككە ارنالعان رەسپۋبليكالىق دومبىراشىلار بايقاۋى مارەگە جەتتى - فوتو
«كۇي مۇرا» اتتى دوڭگەلەك ۇستەل وتىرىسىنا قاتىسقان باتىس قازاقستان وبلىسىنىڭ اكىمى، ءوزى دە دومبىرا ۇستاپ، كۇي شەرتەتىن التاي كولگىنوۆتىڭ اتاپ وتكەنىندەي، قازاق حالقى كۇي ونەرىن جوعارى باعالاپ، كۇيشىلەرىن تورگە شىعارىپ، قۇرمەتتەگەن. مەملەكەت باسشىسى مادەنيەت پەن ونەردىڭ ورگە باسۋى ءۇشىن ءاردايىم قولداۋ كورسەتىپ كەلەدى. سونىڭ ىشىندە ۇلتتىق ونەر دە ۇمىتىلماق ەمەس. تاۋەلسىزدىكتىڭ 25 جىلدىعى قارساڭىندا ۇيىمداستىرىلىپ وتىرعان وسىناۋ شارا - سونىڭ ءبىر ايقىن كورىنىسى.
دوڭگەلەك ۇستەل باسىندا ب ق و حالىق شىعارماشىلىعى ورتالىعىنىڭ ديرەكتورى مەدحات قامبەتوۆ، ەلگە تانىمال دومبىراشىلار، ق ر ەڭبەك سىڭىرگەن قايراتكەرلەرى، قازاق ۇلتتىق ونەر ۋنيۆەرسيتەتىنىڭ پروفەسسورلارى ايتجان توقتاعان، ورىنباي دۇيسەن، ورال قالاسىنداعى 3№ مۋزىكا مەكتەبىنىڭ ديرەكتورى مەرەكە تۇياقوۆ كۇي ونەرىنىڭ قازىرگى جاي-كۇيى تۋرالى ءسوز قوزعاپ، ءوز ۇسىنىس-پىكىرلەرىن ءبىلدىردى. ايتالىق، 2010-جىلى مادەنيەت مينيسترلىگىنىڭ قولداۋىمەن «قازاقتىڭ ءداستۇرلى مىڭ كۇيى» جارىققا شىقتى. كەيبىر دەرەكتەرگە قاراعاندا، قازاق تاريحىندا 7-8 مىڭداي كۇي بولعان.
سول سەبەپتى كۇيلەردى جيناستىرىپ، ءۇن تاسپاعا جازۋ جۇمىستارىن جالعاستىرۋ كەرەك. جەكە ورىنداۋشىلاردى قولداۋدى دا ۇمىتۋعا بولمايدى. سونداي-اق جوعارى جانە ارناۋلى وقۋ ورىندارىندا حالىقتىق اسپاپتار فاكۋلتەتتەرى مەن بولىمدەرىنە جابىلۋ قاۋپى تونسە، اۋىلدىق جەرلەردە كادرلار جەتىسپەۋدە. مۇنى شەشۋ ءۇشىن جەرگىلىكتى اكىمدىكتەر تاراپىنان وقۋ ورىندارىنا گرانتتار ءبولىنىپ، باسقا دا شارالار قولعا الىنسا، دۇرىس بولار ەدى. سول سەكىلدى ورال قالاسىندا بالعىن دومبىراشىلاردى دايارلايتىن مۋزىكا مەكتەبى ءۇشىن ارنايى قازىرگى زامانعى عيمارات سالىنىپ، وعان وبلىستىق مارتەبە بەرىلگەنى دۇرىس.
ەكى كۇنگە سوزىلعان رەسپۋبليكالىق بايقاۋ قورىتىندىسىندا ەلىمىزدىڭ سەگىز وڭىرىنەن قاتىسقان ۇمىتكەرلەر اراسىنان قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتى، الماتى اتىنان شىققانمەن، باتىس قازاقستان وبلىسىنان تۇلەپ ۇشقان ازامات شىناروۆ سۋىرىلىپ شىعىپ، باس جۇلدەنى جەڭىپ الدى.
استانالىق گۇلدانا نۇربايەۆا ءبىرىنشى جۇلدەنى يەلەنسە، شىعىس قازاقستاندىق دارىن قۇدايبەرگەنوۆ پەن قۇرمانعازى اتىنداعى ورال مۋزىكا كوللەدجىنىڭ تۇلەگى، قازىر ەلورداداعى مەملەكەتتىك اكادەميالىق فيلارمونيادا قىزمەت اتقاراتىن ادىلبەك قوداروۆ ەكىنشى ورىندى ءبولىستى. ءبورلى اۋدانىنىڭ وكىلى ازامات قاليەۆ جانە قوستانايلىق ءمادينا دانەنوۆا مەن اتىراۋلىق نازەركە بازاربايەۆا ءۇشىنشى ورىننان كورىندى.
ايتا كەتەيىك، وڭىردە وسىنداي دارەجەدەگى كۇي دوداسى بيىل ەكىنشى رەت ءوتىپ وتىر. مۇنىڭ الدىندا قاراتوبە اۋدانىندا قۇرمانعازىنىڭ ۇستازى ۇزاق كۇيشىگە ارنالعان رەسپۋبليكالىق دومبىراشىلار بايقاۋى ۇيىمداستىرىلعان بولاتىن.
