امەريكاندىق فۋتبول استانادا

Astana Wolves اۋەسقويلار كومانداسى ءوزىنىڭ العاشقى جاتتىعۋلارىن ەكى جىل بۇرىن باستاعان بولاتىن. بۇگىنگى تاڭدا «قاسقىرلار» كومانداسىنا 40-50 ادام مۇشە. ولار اتالعان سپورت تۇرىنە اسا قۇمار. 18- ماۋسىمدا ورتالىق ازيا ليگاسى اياسىندا فۋتبولشىلار بىشكەكتىڭ «بارىستار» كومانداسىمەن كۇش سىناسادى، دەپ حابارلادى قالا اكىمىنىڭ رەسمي سايتى.

امەريكاندىق فۋتبول كومانداسىن دەنيس كازيميرەنكو مەن اسسەت اينابەكوۆ قۇرعان. ونى جاساقتاۋ يدەياسىن ولار كوپتەن بەرى ويلاپ ءجۇرىپ، وسى سپورت تۇرىنە اۋەس جاندارمەن بىرگە ىسكە اسىرا الدى.

- ءبىر جولى دوسىمنىڭ ۇيىندە سپۋتنيكتىك كانالدان ويىندى كورىپ، ۇناتىپ قالدىم، بۇل سەرپىندى، كۇشتى، ەردىڭ مىنەزىن اشاتىن ويىن. قازىرگى كەزدە استانادا، سودان كەيىن قازاقستاندا فەدەراتسيا قۇرۋدىڭ جولدارىن ىزدەستىرىپ جاتىرمىز. ارينە، بۇل ءۇشىن ءتۇرلى وڭىرلەردەن بىرنەشە كوماندا قاجەت. ازىرگە، ولاردىڭ سانى وتە از. باسقا وڭىرلەردە كوماندالاردى دامىتۋعا بەلسەندى تۇردە قاتىسامىز، جولداستىق كەزدەسۋلەر وتكىزەمىز، ءبىز تولىققاندى ليگا قۇرۋعا مۇددەلىمىز، - دەيدى دەنيس.

سپورتشىلار نازاربايەۆ ۋنيۆەرسيتەتىنىڭ الاڭىندا دايىندالادى. ءبىرىڭعاي جاتتىعۋ جوسپارى ازىرلەندى، بالالار سول بويىنشا جۇمىس ىستەيدى. ولارعا تاجىريبەلى ويىنشىلار مەن جاراقات الىپ، جاتتىعۋعا قاتىسا المايتىندار دا كومەكتەسەدى. كوماندا قۇرامىنا 16 دان 36 جاسقا دەيىنگى فۋتبولشىلار كىرەدى.

دەنە بىتىمىنە قاراماستان، كەز كەلگەن ادامعا بەلگىلى ءبىر پوزيتسيا بەرىلەدى، بۇل سپورت تۇرىنە ءبارى دە قاتىسا الادى. - مەن راننينبەك پوزيتسياسىندا وينايمىن - بۇل دوپپەن جۇگىرەتىن ويىنشى، - امەريكاندىق فۋتبولداعى باستى پوزيتسيالاردىڭ ءبىرى. ال ويىننىڭ وزىنە جاقىندا عانا قوسىلدىم. ءبىر جىل دەگەن كوپ ەمەس، دەگەنمەن وسى ۋاقىتتىڭ ىشىندە كوماندا جيناپ، جاقسى ادامدارمەن، ءارقاشان دا كومەككە كەلۋگە دايىن دوستارىممەن تانىستىم. امەريكاندىق فۋتبول - قاۋىپتى، تۇيىسپەلى سپورت ءتۇرى. وندا كوماندالىق رۋح بار، كەيبىر سپورت تۇرلەرىنە سول جەتىسپەي تۇرادى، - دەيدى Astana Wolves كومانداسىنىڭ ويىنشىسى الەكسەي ميحاسيەۆ.

تاجىريبەلى ويىنشىلاردىڭ ءبىرى باقىت جازىقبەكوۆتىڭ ايتۋىنشا، ءبىر قاراعاندا ويىندا كوپ جاراقات الۋعا بولاتىن سياقتى، ءبىراق بۇل تاجىريبەسىزدىكتەن ورىن الادى. باستىسى، تەحنيكالىق ايلا-تاسىلدەردى مەڭگەرۋ، دۇرىس قۇلاي ءبىلۋ جانە سوققى جاساعاندا ءوز-ءوزىڭدى ۇستانا ءبىلۋ كەرەك، كيىمدى دە تۋرا ولشەم بويىنشا كيۋ قاجەت.

- باستاپقى كەزدە جاتتىعۋعا قاتىسقاندا ءبىر ءتۇرلى كورىنەتىن، ادامدار ءبىرىن ءبىرى يتەرىسىپ جۇرەدى. سىنىپتاسىم ءبىراز ۋاقىت شۇعىلدانىپ، كەيىن مەنى دە شاقىردى. مەن بارعانىما وكىنبەيمىن. ويىنعا دەگەن قىزىعۋشىلىعىم ارتتى. مەن جۇمىس ىستەيمىن، ال مۇندا كوماندامەن بىرگە ۋاقىتىمدى وتكىزۋ ءۇشىن كەلەمىن، جاستارعا ۇيرەتەمىن، دەمالامىن، - دەيدى ول.

فۋتبولشىلار ۇلكەن ماقساتتى كوزدەپ وتىر - الداعى ۋاقىتتا ماڭىزدى ويىن وتەدى. ماتچ ق. مۇڭايتپاسوۆ اتىنداعى ستاديوندا ۇيىمداستىرىلادى جانە بۇل قايىرىمدىلىق شارا بولماق. جينالعان قارجى مۇگەدەكتىگى بار تالانتتى ادامداردى بولگارياعا حالىقارالىق كونكۋرسقا جىبەرۋگە باعىتتالادى. كىرۋ بيلەتىنىڭ قۇنى - 200 تەڭگە.

سونىمەن قاتار، جاقىندا ەلوردادا فلاگ- فۋتبولدان ايەلدەر قۇراماسى قۇرىلدى. امەريكاندىق فۋتبولعا قاراعاندا بۇل تۇيىسپەلى ەمەس سپورت ءتۇرى. قىزدار بەلىنە جالاۋشالار بايلاپ الىپ وينايدى، ال ويىندى توقتاتپاس ءۇشىن قارسىلاسىڭنىڭ جالاۋشاسىن تارتىپ الۋ كەرەك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى