ەلباسى ىشكى ىستەر مينيسترلىگى جانىنان كوشى- قون ماسەلەلەرى جونىندەگى ۇلتتىق بيۋرو قۇرۋدى تاپسىردى
بۇگىن استانادا قاۋىپسىزدىك كەڭەسىنىڭ وتىرىسىندا ق ر پرەزيدەنتى نۇرسۇلتان نازاربايەۆ وسىنداي تاپسىرما جۇكتەدى.
كەڭەس بارىسىندا ەلباسى ەلىمىزدەگى باقىلاۋسىز كوشى- قون ۇدەرىستەرىنە، زاڭسىز كوشۋلەردىڭ، سونىڭ ىشىندە ءوز بەتىنشە جەردى باسىپ الۋدىڭ قالىپتاسىپ وتىرعانىنا نازار اۋدارىپ، بۇنىڭ قىلمىسقا جاعىمدى ورتا بولاتىنىن اتاپ ءوتتى.
«ۇكىمەتكە كوشى- قوندى باقىلاۋدىڭ ىقپالداسقان جۇيەسىن قۇرۋ باعىتىنداعى جۇمىستى جەدەلدەتكەن ابزال، ول زاماناۋي تەحنولوگيانى ەنگىزۋگە نەگىزدەلۋى كەرەك. سونىمەن قاتار، داكتيلوسكوپيالىق تىركەۋ تۋرالى زاڭ جوباسى ازىرلەنۋى كەرەك. ال بۇعان دەيىن حالىقتى تىركەۋ مەن ەسەپكە الۋ تەتىكتەرىنىڭ ورىندالۋى قامتاماسىز ەتىلۋى كەرەك.
جەرگىلىكتى بيلىك ورگاندارىنىڭ باسشىلارى جەر ۋچاسكەلەرىن زاڭسىز باسىپ الۋ مەن ورنالاسۋعا جول بەرگەنى ءۇشىن تىكەلەي جاۋاپ بەرەتىن بولادى. بارلىق اكىمدەرگە وسى جۇمىستى جۇرگىزۋدى تاپسىرامىن جانە ول بويىنشا ءار جارتى جىل سايىن بايانداپ تۇراتىن بولاسىزدار.
بۇدان بولەك، ەلىمىزگە كەلەتىن ميگرانتتاردى مىندەتتى تىركەۋدىڭ مۇمكىندىگىن قاراستىرۋ كەرەك. وسى ايتىلعانداردىڭ بارلىعى، نورماتيۆتىك قۇقىقتىق اكتىلەردە كورىنىس تابۋى شارت. بۇل ەلىمىزدەگى قاۋىپسىزدىك پەن قوعامدىق ءتارتىپتىڭ مۇددەسى ءۇشىن جۇزەگە اسىرىلاتىن بولادى.
ۇكىمەت ىشكى ىستەر مينيسترلىگى جانىنان كوشى- قون ماسەلەلەرى جونىندەگى ۇلتتىق بيۋرونى قۇرۋ تۋرالى جۇمىستى جەدەلدەتۋى كەرەك. ول ميگراتسيالىق ۇدەرىستەردى رەتتەۋگە، وسى سالاداعى جۇمىستارعا تالداۋ جاساۋعا جاۋاپتى بولادى»، - دەدى ن. نازاربايەۆ.
