قازاقستاننىڭ جاس عالىمى ۇلى بريتانياداعى حالىقارالىق عالىمدار سايىسىنا قاتىستى - فوتو
ايتا كەتەيىك، قازاقستاننىڭ جاس عالىمدارى اراسىنداعى كونكۋرس 2015 -جىلى ينۆەستيتسيا جانە دامۋ مينيسترلىگى مەن تەحنيكالىق دامۋ جونىندەگى ۇلتتىق اگەنتتىك تاراپىنان ۇيىمداستىرىلدى. ال قازاقستانداعى British Council-مەن ىنتىماقتاستىق مەموراندۋمى ارقاسىندا كونكۋرس جەڭىمپازى حالىقارالىق FameLab بايقاۋىنا قاتىستىرۋ تۋرالى ۋاعدالاستىققا قول جەتكەن بولاتىن.
«قازاقستاننىڭ ەڭ ۇزدىك جاس عالىمى» كونكۋرسىنا ەلىمىزدىڭ بارلىق دەرلىك وڭىرىنەن 98 عالىم اتسالىسعان. كونكۋرس ناتيجەسىندە باس جۇلدە يەگەرى اتانعان نازاربايەۆ ۋنيۆەرسيتەتىنىڭ تۇلەگى دانا اقىلبەكوۆاعا 7,5 ميلليون تەڭگە تابىس ەتىلىپ، قازاقستان اتىنان حالىقارالىق جارىسقا قاتىسۋ قۇقىعى بەرىلدى. دانا اقىلبەكوۆا ەلىمىزدە وتكەن كونكۋرسقا دەنساۋلىق ساقتاۋ سالاسىنداعى ءوزىنىڭ عىلىمي زەرتتەۋ جۇمىسىن كورسەتكەن بولاتىن. جاس عالىم ەكىنشى ءتيپتى ديابەتپەن ناۋقاستاناتىن ادامدارعا ينسۋلين ەگۋدىڭ جاڭا تاسىلدەرىن زەرتتەۋمەن اينالىسادى. ءدال وسى جوباسىن دانا اقىلبەكوۆا الەمنىڭ 26 ەلىنەن قاتىسۋشىلار باق سىناعان ۇلى بريتانياداعى حالىقارالىق كونكۋرسقا ۇسىندى.
«حالىقارالىق FameLab كونكۋرسىنىڭ چەمپيونى تيتۋلى ءۇشىن سايىس بارىسىندا دانا اقىلبەكوۆا فينالدىق الدىن الا ىرىكتەۋدەن سۇرىنبەي ءوتتى. الايدا، فينالدىڭ قورىتىندى بولىگىنە شىعا المادى. بۇعان نەگىزىنەن وسىنداي دارەجەدەگى كونكۋرستارعا قاتىسۋ تاجىريبەسىنىڭ جەتكىلىكسىزدىگى سەبەپ بولعان بولۋى كەرەك. دەگەنمەن، ءادىلقازىلار قازاقستاندىق جاس عالىمنىڭ جوباسىن لايىقتى باعالاپ، قازاقستان وكىلىنىڭ بۇل كونكۋرسقا ءوزىنىڭ جەكە زەرتتەۋىن ۇسىنعانىن ەرەكشە باعالاعان. ويتكەنى، حالىقارالىق جارىسقا قاتىسۋشىلاردىڭ باسىم بولىگى باسقا اۆتورلاردىڭ عىلىمي جاڭالىقتارى تۋرالى اڭگىمەلەۋ مۇمكىندىگىنە يە بولعان ەدى»، - دەلىنگەن باسپا ءسوز مالىمدەمەسىدە.
ايتا كەتەرلىگى، قازاقستاندىق جاس عالىممەن بىرگە ەلىمىزدەگى كونكۋرستىڭ 2 جانە 3 ورىن يەگەرلەرى دە باردى. ولاردىڭ ۇلىبريتانياعا ساپارىن British Council وكىلدىگى قولداۋ كورسەتتى. جاس عالىمدار حالىقارالىق جارىس اياسىندا باسقا ەلدەردەن كەلگەن ارىپتەستەرىمەن كەزدەسىپ، ءوزارا تاجىريبە بولىسۋگە مۇمكىندىك الدى، سونىمەن قاتار، ولار ايگىلى «Cheltenham Science Festival» حالىقارالىق عىلىمي فەستيۆالىنە قاتىسۋ مۇمكىندىگىنە يەلەندى.
