استانادا «مەرەيلى وتباسى» كونكۋرسىنىڭ قالالىق كەزەڭ جەڭىمپازدارى انىقتالدى
قوبىلبايەۆتار مەن سالىقوۆتار اۋلەتى ءبىرىنشى ورىندى ءوزارا ءبولىستى.
شارانىڭ اشىلۋىندا وتكەن جىلعى بايقاۋ جەڭىمپازدارى جۇگىنىسوۆتار وتباسى مۋزىكالىق تارتۋ جاسادى. قازاقستاندىق ەسترادا جۇلدىزدارى مارجان اراپبايەۆا، ەربولات تولەگەنوۆ («ءازىل الەمى») جانە ت. ب. استانالىقتارعا كەرەمەت كوڭىل كۇي سىيلادى.
ەلوردالىق ۇزدىك وتباسىلاردى استانا قالاسى اكىمىنىڭ ورىنباسارى ەرمەك امانشايەۆ ماراپاتتادى.
كونكۋرس جەڭىمپازدارىنىڭ ءبىرى ارتىستەردىڭ وتباسى سالىقوۆتار مۋزىكالىق سالەم جولدادى.
11 بالا تاربيەلەپ وتىرعان ەرلى-زايىپتى قوبىلبايەۆتار كەلۋشىلەردى ءوز وتباسىلارىنىڭ كوپ ۇلتتىلىعىمەن جانە بىرتۇتاستىعىمەن ءتانتى ەتتى.
- جۇبايىمىز ەكەۋىمىز ۇيلەنگەندە وتباسىمىز ۇلكەن بولادى دەپ بىردەن كەلىستىك. تاعدىردىڭ جازعانىمەن، 9 جىل بالا سۇيە المادىق. تۇڭعىشىمىز دۇنيەگە كەلگەن جىلى بالالار ۇيىنەن ءتورت بالانى اسىراپ الدىق، كەيىننەن تاعى ۇشەۋىن الدىق، قازىرگى كەزدە ءبىزدىڭ 11 بالامىز بار، ونىڭ ىشىندە، ورىس تا، قازاق تا، ۋكراين دا، تۇرىك تە بار، - دەيدى وتاعاسى مۇرات قوبىلبايەۆ.
قوبىلبايەۆتار اۋلەتى وتباسىلىق ءبي ءانسامبلىن قۇرعان، سونىڭ ارقاسىندا بالالار ءتۇرلى ۇلتتاردىڭ ءبيىن دە، ءتىلىن دە مەڭگەرەدى. بالالاردىڭ ءبارى دە قازاق جانە ورىس تىلدەرىندە ەركىن سويلەيدى.
«مەرەيلى وتباسى» ۇلتتىق كونكۋرسىنىڭ قالالىق كەزەڭىنىڭ جەڭىمپازدارى ەندى رەسپۋبليكالىق بايقاۋعا دايىندالادى.
