اسا اۋىر قىلمىستى اشقان پوليتسەيلەر ماراپاتتالدى - قاراعاندى
ماراپاتتاۋ ءراسىمىن قاراعاندى وبلىسىنىڭ ءى ءى د باستىعىنىڭ ورىنباسارى، پوليتسيا پولكوۆنيگى ارداق ىنتىقبايەۆ باستاپ، ق ر ءى ءى م سيمۆوليكاسى بەينەلەنگەن قول ساعاتتار تابىستادى، دەپ حابارلايدى قاراعاندى وبلىسىنىڭ ءى ءى د باسپا ءسوز قىزمەتى.
«سىزدەر وقيعا ورنىنا ءبىرىنشى بولىپ كەلەسىزدەر جانە سىزدەردىڭ ناقتى ءارى جان-جاقتى ارەكەتتەرىڭىزدەن قىلمىستىڭ اشىلۋى جەدەلدەنە تۇسەدى. سونداي-اق، ازاماتتارمەن سىپايى جانە جاقسى قارىم- قاتىناس جاساۋ حالىقتىڭ سەنىمىن ارتتىرادى»، - دەدى ارداق ىنتىقبايەۆ.
ەسكە سالا كەتسەك، اعىمداعى جىلدىڭ 11 -مامىرىندا قاراعاندىداعى ورتالىق ساياباقتا توناۋ قىلمىسى ورىن العان. وقيعا ورنىنا بولىمشە كومانديرى، پوليتسيا ستارشيناسى ارحات ءسادۋاقاسوۆ پەن پوليتسيا ستارشيناسى تالعات ءىلياسوۆ جانە پوليتسيا اعا سەرجانتى يگىلىك التىنبەكوۆتىڭ قۇرامىنداعى اۆتوپاترۋل ءبىرىنشى بولىپ جەتكەن. 39 جاستاعى جابىرلەنۋشىنىڭ سوزىمەن جاسالعان كۇدىكتىنىڭ پورترەتى بويىنشا جول-پاترۋلدىك پوليتسيا پولكىنىڭ بارلىق قۇرامىنا باعىتتاما جىبەرىلگەن. 15 مينۋت ارالىعىندا جوعارىدا اتالعان اۆتوپاترۋل «ءىزىن سۋىتپاي» جابىرلەنۋشى جازباي تانىعان 25 جاسار كۇدىكتىنى قولعا ءتۇسىردى. قۇرىقتاۋ كەزىندە كۇدىكتى ازامات بۇرىن جاسالعان اسا اۋىر قىلمىسقا قاتىستى كۇدىكتىنىڭ فوتوروبوتىمەن سايكەستىگى انىقتالعان.
