قىتايدا تەك قازاق تىلىندەگى كىتاپ ءۇيى اشىلدى
بۇل تۋرالى Baq.kz حابارلايدى.
«قىران» اتتى بۇل كىتاپ دۇكەنى ورتالىق «ۇلتتار» باسپاسى قازاق رەداكسياسىنىڭ دەمەۋىندە، موڭعولكۇرە اۋداندىق پارتكوم ۇگىت ءبولىمىنىڭ جەتەكشىلىگىندە جانە قوناقاي بازارىندا جەكە كاسىپپەن شۇعىلدانىپ وتىرعان نۇرقادىر جاقۋان ۇلىنىڭ ات سالىسۋىمەن اشىلدى.
لەنتا قيۋ سالتاناتىنان سوڭ، باسشىلار مەن وقىرماندار «قىران» كىتاپ دۇكەنىن كوزبەن شولىپ شىقتى. ءور تەكەس اتىرابىنداعى وقىرمانداردى كىلەڭ قازاق تىلىندەگى الۋان مازمۇندى 680 ءتۇرلى كىتاپپەن قامتىلعان بۇل كىتاپ ءۇيى قوناقاي بازارىنان ورىن الدى.
دەمەك، بۇل موڭعولكۇرەدەگى وقىرماندار ءۇشىن قولايلى كىتاپ ساتىپ الۋ مۇمكىندىگىن بەرىپ، كىتاپتىڭ قورلارىن وقىرماندار قولىنا تىكەلەي تابىس ەتكەن ءبىر ەلەۋلى قيمىل بولىپ ەسەپتەلدى.
شەتەلدە جۇرسە دە ءوزىنىڭ انا ءتىلى مەن سالت-ءداستۇرىن ساقتاۋ ماقساتىندا جۇمىس جاساپ جۇرگەن قانداستاردىڭ بەرەكەلى جۇمىسى كوڭىل قۋانتارى ءسوزسىز.
