ءزايتۇن مايى جانە سۇلۋلىق سىرلارى
تەرى كۇتىمىنە تيگىزەر كومەگى كوپ. ءزايتۇن قۇرامىنداعى А, Е, B, D, K دارۋمەندەرى - ناعىز سۇلۋلىق بۇلاعى ىسپەتتەس. ءزايتۇن مايى تەرىنى جۇمسارتىپ، قورەكتەندىرەدى. اسىرەسە، قۇرعاق تەرى ءۇشىن ول - تاپتىرماس ەم. ىلعالدى ۇزاق ۋاقىت ۇستاپ تۇرادى، تەرى جاسۋشالارىنىڭ قايتا قالپىنا كەلۋىنە سەبەپشى بولىپ، اجىمدەردىڭ الدىن الادى.
تەرى كۇتىمى
قۇرعاق تەرىگە ەرەكشە كۇتىم قاجەت. مۇندايدا كومەككە ءزايتۇن مايى كەلەدى. لوسون دايىنداۋ ءۇشىن:
3 اس قاسىق ءزايتۇن مايى
4 اس قاسىق قيار شىرىنى
½ شاي قاسىق اس سوداسى
1 شاي قاسىق راۋشان سۋى (روزوۆايا ۆودا) كەرەك.
بۇلاردىڭ بارلىعىن جاقسىلاپ ارالاستىرىپ، دايىن بولعان قوسپانى بەتكە جاعىپ، ءبىر مينۋتتان كەيىن جىلى سۋمەن جۋىڭىز. مۇنداي لوسوندى ءۇش كۇننەن ارتىق ساقتاۋعا بولمايدى. قيار شىرىنى تەز بۇزىلىپ كەتەدى.
مايلى تەرى ءۇشىن ءزايتۇن مايى مەن ليمون شىرىنى قوسىلعان لوسون دايىنداڭىز. ول ءۇشىن جوعارىداعى لوسون قۇرامىنداعى قيار شىرىنىنىڭ ورنىنا ليمون شىرىنىن، ال اس سوداسىنىڭ ورنىنا تۇز قوسىڭىز.
ءزايتۇن مايىنان دايىندالاتىن تەرىنى الدەندىرەتىن، قورەكتەندىرەتىن ماسكا مايلى تەرى ءۇشىن دە، سونداي- اق قۇرعاق تەرى ءۇشىن دە وتە پايدالى. ول ءۇشىن:
1 شاي قاسىق ءزايتۇن مايى
1 شاي قاسىق قايماق
1 شاي قاسىق ليمون شىرىنى
1 شاي قاسىق ءسابىز شىرىنى
1 اس قاسىق اشىتقى كەرەك.
بارلىعىن ارالاستىرىپ، بەتىڭىزگە جاعىڭىز. 10-15 مينۋتتان كەيىن سالقىن سۋمەن جۋىڭىز.
كوزدىڭ اينالاسىنداعى نازىك تەرىنى نارلەندىرىپ، ونداعى ۇساق اجىمدەردى جازۋ ءۇشىن دە ءزايتۇن مايىن قولدانىڭىز. ول ءۇشىن جىلىتىلعان مايدى كوزدىڭ اينالاسىنا جاعىپ، 30 مينۋتتاي كوزىڭىزدى جۇمىپ جاتىڭىز. مۇمكىن بولسا، بۇل پروتسەدۋرانى كۇندەلىكتى كەشكىسىن قايتالاپ تۇرعان دۇرىس.
قۇرامىنداعى ە دارۋمەنىنىڭ ارقاسىندا ءزايتۇن مايى تەرى جاسۋشالارىنىڭ قايتا قالپىنا كەلۋىنە كوپ كومەك بولادى. وسى ورايدا تەرىنىڭ سوزىلۋىن دا ءزايتۇن مايىمەن «ەمدەۋ» وتە ءتيىمدى. سوندىقتان ىشتەگى (قارىن)، كەۋدەدەگى، جامباستاعى سوزىلعان تەرىنى قايتا قالپىنا كەلتىرۋ ءۇشىن ءزايتۇن مايىن قولدانىڭىز. ول ءۇشىن ءزايتۇن مايىنا 1-2 تامشى ليمون نە اپەلسين مايىن قوسىپ، سوزىلعان تەرىنى ءسۇرتىڭىز.
شاش كۇتىمى
ءزايتۇن مايى شاشتى نارلەندىرىپ، ونى جىبەكتەيىن جۇمسارتىپ، جىلتىراتادى.
باسىڭىزدى جۋار الدىندا ساۋساقتارىڭىزدى ءزايتۇن مايىنا مالىپ الىپ، 10 مينۋتتاي باس تەرىسىنە ماسساج جاساڭىز. ال ودان كەيىن باسىڭىزدى جىلى سۋمەن شايىپ الىپ، ادەتتەگىدەي جۋا بەرىڭىز.
شاشىڭىزدىڭ كولەمىن ارتتىرىپ، جىلتىراتقىڭىز كەلسە:
2 اس قاسىق ءزايتۇن مايى
1 جۇمىرتقا
1 شاي قاسىق الما سىركەسۋى نەمەسە بالدى ارالاستىرىپ، شاشقا جاعىپ، 10 مينۋتتان كەيىن جىلى سۋمەن شايىڭىز. ناتيجەسى كوڭلىڭىزدەن شىعادى.
شاشتىڭ ۇشتانۋىن توقتاتۋ ءۇشىن وعان نارلەندىرەتىن كومپرەسس جاساڭىز. ءبىر ستاكانعا جىلىتىلعان ءزايتۇن مايىن قۇيىپ، شاشتىڭ ۇشىن سوعان سالىپ، 10-15 مينۋت وتىرىڭىز. ودان كەيىن شاشتىڭ ۇشىن جەلكە تۇسىڭىزعا جيناڭىز. باسىڭىزدى جىلىلاپ ورامالمەن وراڭىز. جارتى ساعاتتان كەيىن قالعان مايدى سۋمەن شايىڭىز. مۇنداي كومپرەستى اپتاسىنا ءبىر رەت جاساپ تۇرۋ ارتىق بولمايدى.
