مانشۇك مامەتوۆا اتىنداعى مۇراجاي استاناعا كەلدى

100 گە جۋىق قۇندى جادىگەر مەن ەستەلىك سۋرەتتەر باتىر قىزدىڭ تۋعان قالاسى ورالدان، 1932-1934-جىلدارى وتباسىمەن بىرگە مانشۇكتىڭ ءوزى تۇرعان مۇراجاي-ۇيدەن اكەلىنگەن. بۇگىن استانالىق وقۋشىلار مەن ۇلى جەڭىستىڭ جادىگەرلەرىن كورۋگە قىزىققان مەيماندار مانشۇك مامەتوۆا جايلى ەستەلىكتەرگە قانىق بولدى.

- «مانشۇك رۋحىنا تاعزىم» دەگەن ۇرانمەن جىلجىمالى كورمەمىزدى استاناعا الىپ كەلدىك. كورمەدە باتىردىڭ قامشىسى، كىتاپتارى، جەكە ءوز قولىمەن جازعان 6 حات بار. سوڭعى حاتىندا مانشۇك اناسىنا «مەن ءولىپ كەتسەم، سىزدەر ءۇشىن، وتان ءۇشىن جانىمدى پيدا ەتەمىن» دەگەن. حات جازىپ وتىرعان نيەۆەل قالاسىن قورعاۋ جولىنداعى ەرلىگىمەن ول كۇللى حالقىمىزعا ۇلگى بولارىن قايدان بىلگەن»، - دەيدى ورال قالاسىنداعى م. مامەتوۆا مۇراجايىنىڭ ديرەكتورى سۆەتلانا بەكتەنوۆا.

جىلجىمالى مۇراجاي كوپ ايالداماي، قاھارمان قىز ءجۇرىپ وتكەن جولمەن رەسەيدىڭ سامارا، ماسكەۋ، رجيەۆ، نيەۆەل قالالارىنا ساپارلاپ بارماق. اسكەري مۇراجايعا مۇنىمەن قوسا، الماتىداعى ق ر پرەزيدەنتى مۇراجايىندا زەرتتەلگەن ءبىرقاتار تاريحي قۇجات اكەلىنگەن.

«1 ميلليون 200 مىڭنان استام ادام قىزىل اسكەرگە شاقىرىلىپ، سونىڭ 600 مىڭنان استامى قان مايداندا قازا تاپقان. ەڭبەك ارمياسىنا 700 مىڭنان استام قازاقستاندىق شاقىرىلعان. اسكەر قاتارىنا الۋ قازاقستاندىقتار اراسىندا 22 پايىزدان جوعارى بولعان. بۇل - دۇنيەدەگى ەڭ ۇلكەن كورسەتكىشتەردىڭ ءبىرى. ويتكەنى گەرمانيانىڭ وزىندە موبيليزاتسيالاۋ دەڭگەيى 12 پايىز توڭىرەگىندە بولعان»، - دەگەن دەرەكتەردى العا تارتتى الماتى قالاسىنداعى ق ر پرەزيدەنتى مۇراجايىنىڭ ديرەكتورى، پروفەسسور بوريس جاپاروۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى