قىرعىزستان كارتوبىنا ەنگىزىلگەن ۋاقىتشا شەكتەۋ دەر كەزىندە جاسالدى - قايرات بيسەتايەۆ
بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا قازاقستاننىڭ كارتوپ وسىرۋشىلەر جانە كوكونىس وسىرۋشىلەر وداعىنىڭ ءتوراعاسى قايرات بيسەتايەۆ ءمالىم ەتتى.
«قازىرگى كەزدە قىرعىز كارتوبىنا شەكارا جابىلدى. بۇعان ورىندى سەبەپ بار، ياعني التىن تۇستەس جۇمىر قۇرتتىڭ تارالۋىنا جول بەرمەۋگە قاتىستى جاسالىپ وتىر. ازىق رەتىندە وسى كارتوپتى پايدالانعان كەزدە قاتەر جوق، الايدا ول باسقا داقىلدارعا جۇعۋى ءمۇمىن. بۇل قۇرت تۇينەككە ءتۇسىپ، كەيىننەن توپىراقتا جينالىپ، باسقا داقىلدارعا زاقىم كەلتىرەدى. 10 جىل مەرزىمدە ءونىم شىعىمدىلىعىنىڭ 90 پايىزىنا دەيىن زالال كەلتىرۋى ىقتيمال. وتە قاۋىپتى وسىمدىك اۋرۋى»، - دەدى ق. بيسەتايەۆ.
وسى رەتتە ول ءتيىستى ورگاندار قىس مەرزىمىندە بۇل اۋرۋدى كارتوپتان انىقتاعانىن ايتا كەلە، اقپان ايىنىڭ باسىندا وداق اۋىل شارۋاشىلىعى مينيسترلىگىنە قازاقستانعا كارانتيندىك اۋرۋدىڭ كارتوپپەن بىرگە ەنۋىنە شەكتەۋ جاساۋ ءوتىنىمىن جاساعانىن جەتكىزدى.
«ءبىزدىڭ وتىنىمگە قولداۋ جاسالدى. دەگەنمەن بۇل ۇدەرىس ۇزاققا سوزىلدى، ياعني 2 ايدان استام ۋاقىتقا جالعاستى. ءبىراق تا شەكتەۋ جاسالدى. بۇل قۇرت قاپشىقتارمەن، ىدىستارداعى توپىراقپەن الىسقا تارالۋى مۇمكىن. ءبىزدىڭ ويىمىزشا، بۇل قۇرتى بار كارتوپ تۇقىم رەتىندە پايدالانىلۋى قاۋپى بار. وسى رەتتە بۇدان كەيىنگى ۋاقىتتا دا ق ر اۋىل شارۋاشىلىعى مينيسترلىگى شەتتەن كەلەتىن قاتەرلەرگە جەدەل ارەكەت ەتەدى دەپ سەنەمىز»، - دەدى ول.
ەستەرىڭىزگە سالا كەتەيىك، ق ر اۋىل شارۋاشىلىعى مينيسترلىگىنىڭ باسپا ءسوز قىزمەتىنەن قازاقستان قىرعىزستاننان كارتوپ اكەلۋگە ۋاقىتشا تىيىم سالعانىن حابارلادى.
«سوڭعى كەزدە قىرعىز رەسپۋبليكاسىنان كارانتيندى نىسان - Globodera rostochiensis (Wollenweber) Behrens التىن تۇستەس كارتوپ ءۆيرۋسىن جۇقتىرعان ءونىمدى جەتكىزۋ جاعدايلارى جيىلەدى. اعىمداعى قاڭتار ايىنان بەرى عانا ۆيرۋس جۇقتىرعان كارتوپتى اكەلۋدىڭ 79 وقيعاسى انىقتالىپ، وعان جول بەرىلمەدى، قىرعىز رەسپۋبليكاسىنا بۇل كوكونىستىڭ 1000 توننادان استامى كەرى قايتارىلدى»، - دەلىنگەن حابارلامادا.
كارتوپ گلوبودەروزىنا اكەلىپ سوقتىراتىن بۇل ۆيرۋس وتە زارارلى ەكەنىن اتاپ ءوتۋ كەرەك. كارتوپ ءونىمىنىڭ ساپاسىن جوعالتۋ كورسەتكىشى 25 تەن 90 پايىزعا دەيىن جەتەدى، بۇل توپىراقتىڭ زارارسىزدانۋى مەن سۇرىپ تۇراقتىلىعىنا بايلانىستى.
اۆتور: رۋسلان عابباسوۆ
