ارميا ويىندارىنا قاتىسۋ ءۇشىن اسكەري- مەديتسينالىق ەستافەتا اياقتالدى - فوتو
بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن حابارلادى. بايقاۋ شەڭبەرىندە اسكەري مەديكتەر اسكەرلەردىڭ جاۋىنگەرلىك دايارلىعىن مەديتسينالىق قامتاماسىز ەتۋدە قولداناتىن وزدەرىنىڭ داعدىلارى مەن شەبەرلىكتەرىن كورسەتتى.
بايقاۋ ەكى كەزەڭدە ءوتتى. اتاپ ايتقاندا، «جەكە شەبەرلىك» پەن «كوماندالىق بىرىنشىلىك» . ءبىرىنشى كەزەڭدە اسكەري قىزمەتشىلەر اسكەري- سپورتتىق كەدەرگىلەردەن ءوتتى، شتاتتىق قارۋدان وق اتتى، مەديتسينالىق قىزمەتتىڭ جەكە قۇرامىنا ارنالعان ارنايى دايارلىق بويىنشا نورماتيۆتەردى ورىندادى. ەكىنشى كەزەڭ وقۋ- تاكتيكالىق الاڭنىڭ جابدىقتالعان قاشىقتىعىندا جانە تانكودرومنىڭ دايىندالعان باعدارىندا وتكىزىلدى. وندا مەحانيك- جۇرگىزۋشىلەر جەردىڭ كۇردەلى جاعدايلارىندا وزدەرىنىڭ جۇرگىزۋ شەبەرلىكتەرىن پاش ەتتى. اسكەري اق جەلەڭدىلەر ۇرىس الاڭىنان شارتتى جارالانعانداردى الىپ شىعۋ، زاقىمدالعان ۇرىس تەحنيكاسىنان جارالىلاردى شىعارۋ جونىندە كاسىبي تۇرعىداعى ماشىقتارىن كورسەتتى جانە العاشقى مەديكا- سانيتارلىق كومەك كورسەتتى.
ەكىنشى كەزەڭدە ۇرىس جاعدايلارىندا جۇرگىزۋ بويىنشا كاسىبي قابىلەتتىلىگى بولۋى ءتيىس مەحانيك- جۇرگىزۋشىنىڭ شەبەرلىگى نەگىزگى رولگە يە. مەديتسينالىق قىزمەتتەردىڭ اسكەري قىزمەتشىلەرى مۇنداي سايىستان العاش رەت ءوتىپ جاتقاندارىن ايتا كەتەيىك. قورىتىندىسى بويىنشا جالپى كوماندالىق بىرىنشىلىكتە اەروۇتقىر اسكەرلەرىنىڭ كومانداسى ءبىرىنشى ورىندى، «وڭتۇستىك» وڭىرلىك قولباسشىلىعى ەكىنشى ورىندى يەلەندى. «جەكە بىرىنشىلىك» اتالىمىندا ەرلەر اراسىندا 11971 اسكەري ءبولىمىنىڭ سانيتارلىق نۇسقاۋشىسى اعا سەرجانت ەرجان ەلۋبايەۆ، ايەلدەر اراسىندا 61993 اسكەري ءبولىمى مەديتسينالىق روتاسىنىڭ مەيىربيكەسى اعا سەرجانت ەلنارا بۇتىمبايەۆا ۇزدىك اتاندى. 12 ۇزدىك اسكەري مەديك ەندى 2016 -جىلعى ارميا حالىقارالىق ويىندارىنا قاتىسۋعا دايىندالادى. جاتتىقتىرۋ قورىتىندىسى بويىنشا 6 اسكەري مەديك رەسەي فەدەراتسياسىندا وتەتىن ارميا ويىندارى-2016 حالىقارالىق كەزەڭىنە قاتىسۋدى جالعاستىرادى. مۇنداي جارىستاردىڭ ماقساتى حالىقارالىق اسكەري ىنتىماقتاستىقتى نىعايتۋ، اسكەري قىزمەت پەن مەديتسينالىق مامانداردىڭ اسكەري- كاسىبي قىزمەتىنىڭ بەدەلىن ارتتىرۋ بولىپ تابىلاتىنىن ەستەرىڭىزگە سالا كەتەيىك.
