الماتىدا شاحماتتان ەرلەر مەن ايەلدەر اراسىندا قازاقستان چەمپيوناتى باستالدى - فوتو
وعان وسى بىرىنشىلىكتىڭ باستاپقى كەزەڭدەرىنەن وتكەن 10 ايەل شاحماتشى مەن 12 ەركەك شاحماتشى قاتىسۋدا. ولاردىڭ اراسىندا رينات جۇمابايەۆ، مۇرتاس قاجىعاليەۆ، جانسايا ابدىمالىك، ءمادينا داۋلەتبايەۆا، گۇلميرا داۋلەتوۆا سەكىلدى بەلگىلى گروسسمەيستەرلەر بار.
وسى بىرىنشىلىكتە توپ جارىپ، چەمپيون اتانعاندار قازاقستان قۇراما كومانداسىنىڭ قۇرامىندا بيىل قىركۇيەك ايىندا باكۋدە وتەتىن بۇكىل الەمدىك شاحمات وليمپياداسىندا ەل نامىسىن قورعايتىن بولادى. ال بىرىنشىلىككە قاتىسىپ جاتقان جاس شاحماتشىلار تاجىريبە جيناقتايدى.
«قازاقپارات» تىلشىسىنە بەرگەن سۇحباتىندا حالىقارالىق اربيتر، شاحماتتان ەلىمىزدىڭ ايەلدەر بىرىنشىلىگىنىڭ باس سۋدياسى، قازاقستاننىڭ ەرلەر قۇراما كومانداسىنىڭ باس باپكەرى، حالىقارالىق گروسسمەيستەر سەرىكباي تەمىربايەۆ بيىلعى چەمپيوناتتىڭ باستى ەرەكشەلىكتەرىنە توقتالدى.
«قازاقستاننىڭ شاحمات تاريحىندا تۇڭعىش رەت ايەلدەر اراسىنداعى بىرىنشىلىك اينالما فورماتتا وتكىزىلىپ جاتىر. بۇل جەردە ءاربىر شاحماتشى ءبىر-بىرىمەن وينايدى. سايكەسىنشە، بۇل ەڭ مىقتى سپورتشىلاردى ءادىل تۇردە ىرىكتەپ الۋعا مۇمكىندىك بەرەدى. بۇعان دەيىن بۇقارالىق شۆەيتساريالىق جۇيە قولدانىلىپ كەلگەن بولاتىن. وسىلايشا، بيىل چەمپيوناتتىڭ فينالدىق كەزەڭىندە شۆەيتساريالىق جۇيە بويىنشا ايەلدەر اراسىندا 9 تۋر، ەرلەر اراسىندا 11 تۋر وتكىزىلەدى. بۇل جەردە حالىقارالىق رەيتينگ سانالادى»، - دەدى س. تەمىربايەۆ.
سونىمەن قاتار، ول تۇڭعىش رەت چەمپيوناتتىڭ بارلىق پارتيالارىنىڭ ونلاين رەجىمىندە ترانسلياتسيالاناتىندىعىن جەتكىزدى.
«ءبىز بۇعان دەيىن ءار ءتۇرلى جارىستاردا ونلاين جۇيەنى قولدانعانىپ كەلگەنبىز. ءبىر جەردە ءساتتى بولسا، ءبىر جەردە ءساتسىز بولىپ جاتتى. ال، قازاقستاننىڭ چەمپيوناتىندا رەسمي تۇردە تۇڭعىش رەت قولدانىلىپ وتىر. بۇل ءۇشىن تاياۋدا ءتيىستى جاڭا ەلەكتروندى قۇرىلعىلار ساتىپ الىندى. ەندى، وسى چەمپيوناتتىڭ بارلىق پارتيالارىن ينتەرنەت ارقىلى ونلاين رەجىمىندە https://kazchess.kz سايتى بويىنشا تاماشالاۋعا بولادى. تۋرنير وتە جوعارى دەڭگەيدە وتەدى دەگەن ۇمىتتەمىن»، - دەدى س. تەمىربايەۆ.
ايتا كەتەلىك، چەمپيونات 13- مامىرعا دەيىن سوزىلادى. قازاقستاننىڭ شاحمات فەدەراتسياسى بيىلعى بىرىنشىلىكتە قوماقتى جۇلدە قورىن ازىرلەدى. ەرلەر چەمپيوناتىنىڭ جۇلدە قورى - 1,5 ميلليون تەڭگە، ال ايەلدەر چەمپيوناتىنىڭ جۇلدە قورى - 1,2 ميلليون تەڭگەنى قۇرادى. جەڭىمپازعا بەرىلەتىن سىياقى شامامەن - 300 مىڭ تەڭگەدەن استام. بۇل جەردە بارلىق قاتىسۋشىلارعا بەلگىلى ءبىر كولەمدە سىياقى بەرىلەدى.
ەستەرىڭىزگە سالا كەتەلىك، تاياۋدا - 28- ناۋرىز بەن 5- ءساۋىر ارالىعىندا بىرىككەن اراب امىرلىگىنىڭ استاناسى - ابۋ-دابي قالاسىندا شاحماتتان ازيانىڭ كوماندالىق چەمپيوناتىندا قازاقستاننىڭ ايەلدەر جانە ەرلەر قۇراما كومانداسى قىتاي مەن ءۇندىستان قۇرامالارىن العا جىبەرىپ، جۇلدەلى ءۇشىنشى ورىنعا يە بولدى.
