قاراعاندىدا ناۋقاس قىزدى قولداۋ ءۇشىن جول تالعامايتىن كولىكتەردىڭ جارىسىن وتكىزدى - فوتو
ماقساتى - ىسىك اۋرۋىنا شالدىققان 2 جاسار ايدا ۆاسكونى ەمدەۋگە قاراجات جيناۋ، دەپ حابارلادى «قازاقپارات» ح ا ا ءتىلشىسى.
«مۇنداي اۋقىمداعى شارانى العاش رەت ۇيىمداستىرىپ وتىرمىز. كلۋبىمىز جۋىردا قۇرىلدى، - دەدى «4x4» دجيپتەر كلۋبىنىڭ اكىمشىسى ۆيتالي پولۋنين. - 2 جاسار ايدا ۆاسكونى ەمدەۋگە قاراجات جيناپ جۇرگەن ەرىكتىلەر كەلىپ كومەك سۇرادى. ءۇش اۆتوكلۋب قوسىلىپ، ونى قولداۋعا بەل بۋدىق».
جارىسقا قاتىسۋشىلار مىندەتتى تۇردە 1500 تەڭگە، قالاعاندارى ودان كوپ اقشا تولەدى. كورەرمەندەر دە اقشالاي كومەك كورسەتتى. بۇل ءۇشىن ارنايى جاشىك قويىلدى.
ەرىكتى جانە ايدانىڭ اناسىنىڭ قۇربىسى اسەل جيەنبەكوۆانىڭ سوزىنە قاراعاندا، قىزدى ەمدەۋگە 20 مىڭ دوللار جيناۋ قاجەت. قازىر 1 ميلليون تەڭگەدەن استام قاراجات جينالعان ەكەن. «وسىنشاما كوپ ادام قولداۋ كورسەتەدى دەپ ويلاماپپىن. كومەگىن اياماعان جانداردىڭ بارلىعىنا العىس ايتقىم كەلەدى، - دەدى ول.
- يننامەن قۇربى بولعانىما 15 جىلدان استى. ايدانىڭ اۋىر دەرتكە ۇشىراعانىن جارتى جىل بۇرىن بىلدىك. ارينە، بۇعان قول قۋسىرىپ قاراپ وتىرا المادىم. قىزدىڭ اناسىندا دوستارىنان باسقا ەشكىمى جوق».
جيپ-سپرينتتە 11 قاتىسۋشى بولدى، بىرنەشەۋى ءبىرىنشى كەزەڭدە ءسۇرىندى. جارىس الاڭى بالشىعى كوپ، كۇردەلى جول تاڭدالعان.
توتەنشە جاعداي دا ورىن الدى. Toyota Land Cruiser ءجيپى اۋدارىلدى. اۆتوموبيلدى دەرەۋ اياعىنا تۇرعىزدى. ابىروي بولعاندا، ەشكىم جاپا شەككەن جوق. كولىك يەسىنە تەمىر تۇلپارىن جوندەۋگە اۆتوكلۋب مۇشەلەرى كومەكتەسۋگە ءسوز بەردى.
