قىتايعا اۆستراليالىقتار تازا اۋا جەتكىزە باستادى
ولار تەمىر قالبىرعا اۋا جيناپ، ونى اۆستراليادان قىتايدىڭ قورشاعان ورتاسى لاستانعان جەرلەرىنە جەتكىزەدى. Mashable سايتىنىڭ جازۋىنا قاراعاندا، ءبىر قالبىرداعى تازا اۋا 130 رەت تەرەڭ دەم الۋعا جەتەدى.
اۋانى وڭتۇستىك ءۋەلستىڭ كوگىلدىر تاۋلارىنان، بوندي جاعاجايىنان، قۇرلىقتىڭ ءىرى تۋريستىك ورتالىقتارىنىڭ ءبىرى - گولد- كوست قالاسىنان جەتكىزەدى. قىتايلىقتار ءبىر بانكى اۋانى شامامەن 20 دوللارعا ساتىپ الادى.
اۆستراليا اۋاسىمەن تىنىستاۋ ءۇشىن ءار قۇتىعا قوسا بەرىلگەن بەتپەردەنى پايدالانۋ جەتكىلىكتى. بيزنەسمەندەر اۋا زارارسىزداندىرىلعان جابدىق كومەگىمەن الىناتىنىن، ساپا باقىلاۋىنان وتەتىنىن اتاپ وتكەن.
قىتايلىق ساۋداگەر ۆيۆيان جوۋدىڭ ايتۋىنشا، اۋانىڭ لاستانۋى - ەل ءۇشىن ۇلكەن پروبلەما ەكەنىن، ال ساتىپ الۋشىلار اۆستراليالىق اۋانى جاقسى كورەدى ەكەن.
