ا. مامىتبەكوۆ: شارۋالار مەملەكەت قولداۋىنان شەت قالمايدى
سوڭعى جىلدارى استىقتى ايماقتا اگرارلىق سالا بويىنشا 167 ينۆەستيتسيالىق جوبا جۇزەگە اسقان. سونىڭ نەگىزىندە 3 مىڭنان استام جاڭا جۇمىس ورنى اشىلعان. اۋىلشارۋاشىلىق ونىمدەرى كورمەسىن تاماشالاعان مينيستر وڭىردەگى كاسىپورىنداردىڭ الداعى جوسپارلارىن تىڭداپ، جاڭا جوبالارىمەن تانىستى. كەيىن «اگروبيزنەس - 2020» باعدارلاماسى اياسىندا اگرارلىق سالانى مەملەكەتتىك قولداۋ ماسەلەلەرى تالقىلاندى. بيىل مەملەكەت ەگىستىك القاپتاردى گەكتار بويىنشا سۋبسيديالاۋدى توقتاتقانى بەلگىلى. ءبىراق ول قارجى شارۋالاردىڭ وزگە قاجەتتىلىكتەرىنە جاراتىلماق.
اسىلجان مامىتبەكوۆ، ق ر اۋىل شارۋاشىلىعى ءمينيسترى:
- اۋىلشارۋاشىلىق تەحنيكاسىن ساتىپ الاتىن بولسا، ونىڭ 25 پايىزىن سۋبسيديالايمىز دەپ جوسپارلاپ وتىرمىز. بيىل داستۇردەگىدەي جەڭىلدەتىلگەن باعامەن جانار-جاعارماي بەرىلدى جانە دە جەڭىلدەتىلگەن پايىزبەن 60 ميلليارد نەسيە بەرىلدى. سونداي-اق باسقا دا سۋبسيديالاردىڭ تۇرلەرى، مىسالى، گەربيتسيدكە، تىڭايتقىشقا بەرىلەتىندەرىنىڭ كولەمى دە ۇلعايىپ جاتىر.
