قاللەكي تەاترىنىڭ ساحناسىندا «شيە» كومەدياسىنىڭ پرەمەراسى وتەدى
ءساۋىر ايىنىڭ 18-19 - كۇندەرى ساعات 19.00-دە بەلگىلى ورىس دراماتۋرگى انتون چەحوۆتىڭ «شيە باعى» پەساسىنىڭ نەگىزىندە «شيە» كومەدياسىنىڭ پرەمەراسىن وتكىزەدى، دەپ حابارلايدى تەاتردىڭ اقپارات ورتالىعى.
سپەكتاكلدىڭ رەجيسسەرى - ياكۋتيادان ارنايى شاقىرتىلعان تانىمال تەاتر جانە كينو رەجيسسەرى، ياكۋتيانىڭ ەڭبەك سىڭىرگەن ونەر قايراتكەرى، رەسەيدىڭ ۇلتتىق تەاترلارىنىڭ اراسىندا وتەتىن «زولوتايا ماسكا» سىيلىعىنىڭ يەگەرى سەرگەي پوتاپوۆ.
عاسىرلار تۇيىسكەندە ادام بالاسىنىڭ باسىنا تۇسەتىن قۇسا- شەردى، رۋحاني باعداردىڭ جوقتىعىن سەزىنۋدەن تۋار اۋىرتپالىقتى، ءولىارا شاقتا كەيىپكەرلەردى توريتىن جالعىزدىق كەسەلىن چەحوۆ پەساسىندا ىشكى يىرىمدەرمەن بەرگەن. رەجيسسەر سەرگەي پوتاپوۆ مودەرنيستىك بايانمەن ومىردە ماقساتسىز، قورعانىشسىز، دارمەنسىز سەندەلگەن جانداردىڭ تۇرمىس- تىرشىلىگىن سىرتى كۇلكى بولعانىمەن تۇبىندە تۇنعان كوز جاسى ارقىلى بەرۋگە ۇمتىلعان. چەحوۆتىڭ سۋرەتكەرلىك ۇلىلىعى، ادامسۇيگىشتىگى ونىڭ قاھارماندارىنىڭ ۋاقىت پەن كەڭىستىكتەن تىس جاساي بەرەتىن شىنايىلىعىندا. وسى ورايدا، سپەكتاكل كورەرمەن قاۋىمدى سەلسوق قالدىرماسى انىق.
ساحنا تورىندە رەجيسسەردىڭ شەشىمى بويىنشا ل. ا. رانيەۆسكايا بەينەسىن شيە ەسىمىمەن تەاتردىڭ جاس اكتريساسى، «زولوتوي ۆيتياز 2015» حالىقارالىق تەاتر فەستيۆالىنىڭ التىن ديپلوم يەگەرى اقمارال تانابايەۆا ساحنالايدى. سونداي- اق، سپەكتاكل بارىسىندا بۇگىندە كورەرمەننىڭ ىستىق ىقىلاسىنا بولەنىپ جۇرگەن تەاتر ارتيستەرى، قازاقستاننىڭ ەڭبەك سىڭىرگەن قايراتكەرلەرى - ك. نۇرلانوۆ، ق. قىستىقبايەۆ، ن. وتەۋىلوۆ، ق ر «دارىن» جاستار سىيلىعىنىڭ يەگەرى س. قاشقابايەۆ، اكتريسا ا. ايماعامبەت، د. اليموۆ، ش. وردابايەۆ، ا. يبرايەۆا، ج. يسكاكوۆا ونەر كورسەتەدى.
