وڭتۇستىكتىڭ «سارى اعاش» مينەرالدى سۋى شەتەل نارىعىنا شىعارىلماق
وڭىردەگى جەراستى سۋىن وندىرەتىن كاسىپورىن مەملەكەتتەن تومەن پايىزبەن قوماقتى نەسيە العان. ەندى زاۋىتتى زاماناۋي قوندىرعىلارمەن جابدىقتاماق.
زاۋىتتىڭ نەگىزى وسىدان تۋرا 18 جىل بۇرىن قالانعان ەكەن. سودان بەرى توقتاۋسىز جۇمىس ىستەپ كەلە جاتقان قوندىرعىلار ءبىرشاما ەسكىرگەن. ونى جاڭعىرتۋعا قارجى قولبايلاۋ بولىپتى. كاسىپكەردىڭ ءوندىرىس قۋاتتىلىعىن ارتتىرسام دەگەن ويىنا مەملەكەتتىك باعدارلاما قولداۋ بولعان. كاسىپورىن قازىردىڭ وزىندە ساعاتىنا تابيعي مينەرالدى سۋ قۇيىلعان 3,5 مىڭ دانا دايىن ءونىم شىعارىپ جاتىر. زاۋىتتىڭ قۋاتتىلىعى بولاشاقتا ەكى ەسەگە دەيىن ارتادى. قازىردىڭ وزىندە ىشكى نارىقتىڭ 75 پايىزىن قامتاماسىز ەتىپ وتىرعان كاسىپورىن بولاشاقتا وتاندىق ءونىمدى شەتەل نارىعىنا شىعارۋدى جوسپارلاپ وتىر. مىڭ مەتر تەرەڭدىكتەن شىعىپ جاتقان جەراستى سۋى بىرنەشە قايتارا سۇزگىدەن وتكىزىلىپ بارىپ، ىدىستارعا قۇيىلادى. سۋدىڭ قۇرامى ءجىتى باقىلانادى. ونى قاداعالاپ وتىراتىن جەكە زەرتحانالارى دا بار.
«سۋدىڭ قۇرامىنداعى حيميا- فيزيكالىق پروتسەسستى قاداعالاپ وتىرامىز. ميكروبيولوگيالىق وزگەرىستەرى دە باقىلانادى. مينەرالدى سۋ قۇرامىنداعى ميكروكومپونەنتتەر مەن ميكروورگانيزمدەرگە قاراپ، ەرەكشەلەنەدى. بۇل تابيعي مينەرالدى اس سۋى بولعاندىقتان، ونى كۇندەلىكتى ىشە بەرۋگە بولادى»، - دەيدى زاۋىت زەرتحاناسىنىڭ مەڭگەرۋشىسى.
زاۋىتتاعى جۇمىستاردىڭ ءبىرقاتارى بۇعان دەيىن قولمەن اتقارىلاتىن. ال ەندى ورناتىلاتىن جاڭا جۇيە تولىقتاي كومپيۋتەرمەن باسقارىلادى. كاسىپورىن باسشىلارى سونىڭ ارقاسىندا بولاشاقتا وتاندىق تاۋاردى كەدەندىك وداق اۋماعى مەن ەۋروپا ەلدەرىنىڭ نارىعىنا شىعارۋدى كوزدەپ وتىر.
«جاڭعىرتۋ جۇمىستارى زاۋىتتىڭ قۋاتتىلىعىن ارتتىرىپ قانا قويماي، ونىمگە دەگەن سۇرانىستى تولىق قامتاماسىز ەتۋگە مۇمكىندىك بەرەدى. سۋدىڭ قۇرامىن انىقتاۋ ءۇشىن ءبىز ەۋروپاعا تەكسەرۋگە جىبەرەمىز. ارنايى ماماندار ساراپتامادان وتكىزىپ، زەرتحانالىق جۇمىستاردىڭ قورىتىندىسىن جىبەرەدى. سونىڭ نەگىزىندە سەرتيفيكات الامىز» ، - دەيدى زاۋىت باسشىسىنىڭ ورىنباسارى قۇربانكۇل چيناكۋلوۆا.
كاسىپكەر مەملەكەتتەن 75 ميلليون تەڭگە كولەمىندە تومەن پايىزبەن نەسيە العان. ونىڭ وزىندە 14 پايىز ۇستەمەنىڭ تەڭ جارتىسىن عانا تولەيدى. بۇل ءبىرىنشى كەزەكتە وتاندىق تاۋار وندىرۋشىلەرگە ۇلكەن كومەك جانە سىرتتان تاسىمالداناتىن تۇتىنۋ تاۋارلارىنىڭ سانىن ازايتۋعا مۇمكىندىك بەرەدى. زاۋىتتاعى ەسكىرگەن قوندىرعىلار ەندى بىرەر اپتادا جاڭاسىنا اۋىستىرىلادى. سوندا كاسىپورىننىڭ قۋاتتىلىعى ارتىپ، ىشكى نارىقتان ارتىلعان وتاندىق ءونىمدى شەتكە جونەلتۋگە بولادى، دەپ جازادى 24.kz.
فوتو:vitebsk.e-mogilev.com
