سانكسيالىق سوعىستار قازاقستانعا قاي جاعىنان ءتيىمدى؟

بۇل تۋرالى كەشە استانادا وتكەن باسپا ءسوز ءماسليحاتىندا قازاقستاننىڭ سىرتقى ساۋدا پالاتاسىنىڭ باسقارما ءتوراعاسى مەيىربەك ءماجيتوۆ ءمالىم ەتتى، دەپ حابارلادى Baq.kz ءتىلشىسى.

«قازاقستان رەسەي فەدەراتسياسىنىڭ جەتى بىردەي اۋدانىمەن شەكارالاسىپ وتىر. قازاقستان وسى مۇمكىندىكتى پايدالانىپ، ءوز تاۋارلارىن بارىنشا كوپتەپ ەكسپورتتاۋعا تىرىسىپ كەلەدى. ال رەسەيگە سالىنعان سانكسيالار، سونداي-اق، تۇركيامەن اراداعى شيەلەنىستەن كەيىن قازاقستاندىق ونىمدەرگە دەگەن سۇرانىس كۇرت ءوستى. سول سەبەپتى ءبىز ول نارىقتارعا كىرىپ الۋعا تىرىسىپ جاتىرمىز. بۇل جۇمىس جۇيەلى تۇردە اتقارىلىپ كەلەدى. ماسەلەن، ماسكەۋ قالاسىندا قازاقستاننىڭ ساۋدا ءۇيى بار. ول ارقىلى وتاندىق ونىمدەر كوپتەپ جەتكىزىلىپ وتىرادى. بۇگىندە ءبىز چەليابى، ەكاتەرينبۋرگ، بۇكىل ورال بويىنشا قازاقستاندىق تاۋارلاردى تاراتۋعا كەلىسىپ وتىرمىز. قازىر ءبىزدىڭ ىسكەرلىك توپتار نوۆوسيبيرسك قالاسىندا ءجۇر»، - دەيدى م. ءماجيتوۆ.

سونداي-اق، يران يسلام رەسپۋبليكاسىنا قاتىستى سانكسيالاردى الىپ تاستاعاننان ەلىمىزدىڭ ءبىرشاما پايدا كورگەنىن اتاپ وتكەن ءجون. سىرتقى ساۋدا پالاتاسىنىڭ مالىمەتىنە سايكەس، قازاقستان ول مەملەكەتكە 30 ميلليون دوللاردىڭ سيىر جانە قوي ەتىن جەتكىزىپ بەرەتىن بولدى.

ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى