قازاقستان تاراپى اۋعانستان نارىعىنا تاۋار ەكسپورتتاۋدا پاكىستان كاسىپورىندارىن ىعىستىرماق
بۇل تۋرالى بۇگىن استانادا وتكەن باسپا ءسوز ءماسليحاتىندا قازاقستاننىڭ سىرتقى ساۋدا پالاتاسى باسقارما ءتوراعاسى مەيىربەك ءماجيتوۆ ءمالىم ەتتى.
«اۋعانستان نارىعى ءبىز ءۇشىن قىزىعۋشىلىق تۋدىرىپ وتىر. بۇل ەلدە بۇگىندە ايتارلىقتاي تۇراقتى بولماسا دا، دەگەنمەن دە نارىقتارى قالپىنا كەلىپ جاتىر. اتاپ ايتقاندا، بۇل مەملەكەتتە قازاقستاننىڭ ۇننان جاسالعان ونىمدەرى مەن استىعى جوعارى سۇرانىسقا يە. جاقىندا اۋعانستانمەن ساۋدا- ساتتىق اۋقىمىن كەڭەيتۋ ماقساتىندا كابۋلدا قازاقستاننىڭ العاشقى ساۋدا ءۇيى اشىلدى. بۇل ءوز كەزەگىندە ەلىمىزدىڭ كاسىپورىندارىنا تاۋارلارىن كەڭىنەن تانىستىرۋعا مۇمكىندىك بەرىپ وتىر»، - دەپ توقتالدى م. ءماجيتوۆ.
وسى رەتتە بيزنەس- قوعامداستىقتاردىڭ ىسكەرلىك كەلىسسوزدەرى ناتيجەسىندە 700000 ا ق ش دوللارى كولەمىندە ونىمدەرگە شارتتار جاسالدى.
«كەلىسسوزدەر اياسىندا ەكسپورت دەڭگەيى ارتا تۇسەدى. اۋعان كاسىپكەرلەرى ۇننان جاسالعان ونىمدەرگە، ونىڭ ىشىندە قازاقستاندىق كەسپەنى يمپورتتاۋعا ايتارلىقتاي قىزىعۋشىلىق تانىتۋدا. اۋعانستان يسلام رەسپۋبليكاسىنداعى قازاقستاننىڭ توتەنشە جانە وكىلەتتى ەلشىسىنىڭ پايىمىنشا، قازاقستان تاراپى ەكسپورتتىق تاۋارلار بويىنشا پاكىستانمەن بەلسەندى باسەكەلەستىككە ءتۇسىپ، ولاردىڭ ونىمدەرىنىڭ ورنىن باسۋعا قاۋقارلى»، - دەدى باسقارما ءتوراعاسى.
مۇنىمەن قوسا، اۋعانستان جاعى قازاقستاننىڭ مۇناي ونىمدەرىن الۋعا قىزىعۋشىلىق تانىتىپ وتىرعان كورىنەدى. سونىمەن قاتار قازاقستاندىق كونديتەرلىك ونىمدەردى ەكسپورتتاۋعا ەلەۋلى مۇمكىندىك جاسالىپ وتىر.
«اۋعانستان ۇكىمەتى تاراپىنان جىل سايىن ينفراقۇرىلىمدىق جوبالاردى جۇزەگە اسىرۋعا 2 ميلليارد دوللار بولىنەدى، ياعني بۇل تۇرعىدا جولداردىڭ، ەلەكتر ەنەرگياسى جەلىلەرى، سۋ قويمالارىنىڭ قۇرىلىستارى قامتىلىپ وتىر. وسى ورايدا ءبىزدىڭ كاسىپورىندارعا بۇل قۇرىلىس نارىعىنا كىرۋگە جاقسى مۇمكىندىك بار. بۇگىندە قۇرىلىس جوبالارىنا قاتىسۋ ءۇشىن قازاقستاندىق كاسىپورىنمەن الدىن الا كەلىسىم جاسالدى»، - دەدى مەيىربەك ءماجيتوۆ.
اۆتور: رۋسلان عابباسوۆ
