ەرجان قاجى مالعاجى ۇلى: ناۋرىز - ۇلتتاردى بىرلىككە ۇيىستىراتىن ءتول مەرەكە
«قۇرمەتتى باۋىرلار، وتانداستار!
بارشالارىڭىزدى كۇن مەن ءتۇننىڭ تەڭەسكەن، شىعىس حالىقتارىنىڭ مەرەكەسى بولعان، ەجەلگى زاماننان قالىپتاسقان جىل باسى - ناۋرىز مەيرامىمەن قۇتتىقتايمىن!
بۇل كۇنى حالقىمىز داستارحان جايىپ، قوناق كۇتىپ، قاريالارىمىز باتا بەرەدى. «ۇلىس وڭ بولسىن، اق مول بولسىن!»، - دەگەن تىلەك-دۇعالار ايتىلاتىن ناۋرىز - بىرلىكتىڭ، ىنتىماقتىڭ، بەرەكە مەن تاتۋلىقتىڭ مەرەكەسى.
بۇل كۇنى ارازداسقاندار - ادامگەرشىلىك، رەنجىسكەندەر - راقىمدىلىق جولىن ۇستانادى. وسىناۋ ىزگىلىك مەرەكەسىندە ادامدار كەشىرىمدىلىككە، تاتۋلىققا ۇيىسادى.
ۇلىستىڭ ۇلى كۇنى ءبىزدىڭ ەلىمىز ءۇشىن ءارقاشان كيەلى سانالعان. حالقىمىز ناۋرىز مەيرامىن اتا-بابامىزدان جالعاسىن تاۋىپ كەلە جاتقان ۇلتتىق مەرەكە، سالت-ءداستۇرىمىزدىڭ جالعاسى دەپ تويلايدى.
وتباسىلارىڭىزعا اماندىق، دەندەرىڭىزگە ساۋلىق، جۇمىستارىڭىزعا بەرەكە تىلەيمىن.
اللا تاعالا ريزىق-نەسىبەمىزدى مولايتىپ، بىرلىك-بەرەكەمىزدى ارتتىرعاي. ناۋرىز مەرەكەسى قۇتتى بولسىن!»، - دەلىنگەن باس ءمۇفتيدىڭ قۇتتتىقتاۋىندا.
