ەلوردادا مەكتەپ مەديتسيناسى دەنساۋلىق ساقتاۋ جۇيەسىنە بەرىلەدى
استانا قالاسى اكىمىنىڭ تاپسىرماسىمەن دەنساۋلىق ساقتاۋ باسقارماسى ءبىلىم باسقارماسىمەن جانە تۇتىنۋشىلاردىڭ قۇقىعىن قورعاۋ دەپارتامەنتىمەن بىرلەسىپ مەكتەپ مەديتسيناسىن دەنساۋلىق ساقتاۋ باسقارماسىنىڭ ۆەدومستۆولىق قاراۋىنا بەرۋ تۋرالى جول كارتاسىنا قول قويدى.
قۇجاتقا سايكەس، مەكتەپ مەديتسيناسىنىڭ دەنساۋلىق ساقتاۋ باسقارماسىنىڭ قاراۋىنا ءوتۋى كەزەڭ- كەزەڭمەن جۇرگىزىلەدى. مەكتەپتەگى مەديتسينا قىزمەتكەرىنىڭ فۋنكتسيونالدىق مىندەتتەرى مەن ءرولى قايتا قارالادى، مەديتسينا قىزمەتكەرلەرىنىڭ شتاتتىق نورماتيۆتەرىن ەسەپتەۋ قايتا جۇرگىزىلەدى، مەديتسينا قىزمەتكەرلەرىنىڭ ءبىلىم دەڭگەيىن ارتتىرۋدىڭ ءبىرىڭعاي كەشەندى ادىستەمەلىك ءتاسىلى قامتاماسىز ەتىلەدى.
«سوڭعى جىلدارى مەكتەپتەگى مەديتسينالىق كابينەتتەرگە ءتيىستى ليتسەنزيالار مەن قاجەتتى قوندىرعىلار، جيھاز، ءدارى- دارمەكتەر الىندى. مەكتەپ مەديتسيناسىن دەنساۋلىق ساقتاۋ باسقارماسىنىڭ قاراۋىنا وتكىزگەننەن كەيىن دە ءبىز بۇل ماسەلەگە جاۋاپتى بولامىز. باستىسى، بۇل وزگەرىس مەكتەپتەردە جۇمىس ىستەيتىن مەديتسينالىق كادرلاردىڭ وزدەرىنە وڭ اسەرىن تيگىزبەك. دەمەك، كورسەتىلەتىن قىزمەتتەر ساپاسى ارتادى»، - دەدى ءبىلىم باسقارماسىنىڭ باسشىسى ەلميرا سۋحانبەردييەۆا.
وتكەن جىلدارى مەكتەپتەردەگى مەديتسينا قىزمەتكەرلەرى اتتەستاتسيادان دەنساۋلىق ساقتاۋ جۇيەسىندە ءوتىپ كەلدى. سوڭعى وزگەرىستەردەن كەيىن ولاردىڭ ەڭبەكاقىسى وسەدى، ال جۇكتەمەسى ازايادى. دەنساۋلىق ساقتاۋ جۇيەسىندە نورماتيۆتەر بويىنشا ءبىر مەيىربيكەگە 600 بالادان كەلەدى. ال قازىرگى مودەل بويىنشا 3000 استام بالا وقيتىن ناقتى مەكتەپتە ءبىر عانا مەيىربيكە (ءبىر جارىم ستاۆكاعا) جۇمىس ىستەيدى. سونىمەن قاتار، دەنساۋلىق ساقتاۋ جۇيەسىنە ءوتۋ بۇگىندە 37 جۋرنال تولتىرىپ جۇرگەن مەديتسينا قىزمەتكەرلەرىنىڭ فۋنكتسيونالدىق مىندەتتەرىن قايتا قاراۋعا مۇمكىندىك بەرەدى.
دەنساۋلىق ساقتاۋ باسقارماسىنىڭ باسشىسى ەرىك ءبايجۇنىسوۆتىڭ ايتۋىنشا، بۇل ەڭ الدىمەن وسكەلەڭ ۇرپاقتىڭ دەنساۋلىعىن قورعاۋعا باعىتتالعان وتە ماڭىزدى شەشىم.
«استانا بۇل جۇمىستى رەسپۋبليكا بويىنشا ءبىرىنشى بولىپ قولعا الىپ وتىر. اڭگىمە ءبىزدىڭ بالالارىمىز تۋرالى بولعاندىقتان بۇل ماسەلە ءبىلىم بەرۋ جۇيەسىندە دە، دەنساۋلىق ساقتاۋ جۇيەسىندە دە ەڭ ماڭىزدىلاردىڭ ءبىرى بولىپ تابىلادى. ءبارىمىز دە ولاردىڭ دەنساۋلىعىنا الاڭدايمىز، سوندىقتان دارىگەرلەردىڭ بىلىكتىلىگىنە باسا نازار اۋدارامىز. ءبىرىنشى كەزەكتە، مەكتەپتەگى مەديتسينا قىزمەتكەرلەرىنىڭ بارلىعى ءوز بىلىكتىلىكتەرىن ارتتىرادى»، - دەدى ە. ءبايجۇنىسوۆ.
دەنساۋلىق ساقتاۋ باسقارماسى باسشىسىنىڭ ايتۋىنشا، ءاربىر وقۋشىمەن جەكە جۇمىس ىستەۋگە ءتيىس بولاتىن، قاجەت بولعاندا جۇكتەمەنى انىقتايتىن - دەنە شىنىقتىرۋمەن اينالىسۋ ساعاتتارىن، ەم- ءدام، پارتا قاتارىن جانە ت. ب. بەلگىلەيتىن مەكتەپتەگى مەديتسينا قىزمەتكەرىنىڭ ستاتۋسىن قايتا قاراۋ قاجەت. بۇل رەتتە دارىگەرلەردىڭ بارلىعى قالالىق ەمحانالاردا دەپ ەسەپتەلەدى.
پروفيلاكتيكالىق تەكسەرۋ مالىمەتتەرى بويىنشا سوڭعى ءۇش جىلدا وقۋشىلاردىڭ اۋىرۋ قۇرىلىمىندا ءبىرىنشى ورىندا تىنىس الۋ ورگاندارى اۋرۋلارى، ەكىنشى ورىندا - اس قورىتۋ ورگاندارى اۋرۋلارى، ءۇشىنشى ورىندا - كوز اۋرۋلارى، ءتورتىنشى ورىندا - جۇيكە جۇيەسى اۋرۋلارى جانە بەسىنشى ورىندا - قان، قان جاساۋ ورگاندارى اۋرۋلارى، سونىڭ ىشىندە قانازدىق.
بىرنەشە جىلدان بەرى زاماناۋي ستوماتولوگيالىق قىزمەتتەر كورسەتۋ جاعىنان وقۋشىلاردى ساۋىقتىرۋ ماسەلەسى وزەكتى بولىپ كەلەدى، ويتكەنى ءتىس جەگى بالالار اراسىندا كەڭىنەن تاراعان اۋرۋلاردىڭ ءبىرى. بۇگىنگى تاڭدا 80 استام قالالىق مەكتەپتىڭ تەك 11 عانا 2004 -جىلى ساتىپ الىنعان ستوماتولوگيالىق قۇرالدار بار. 70 مەكتەپتى ستوماتولوگيالىق قۇرالدارمەن جابدىقتاۋ ماسەلەسى قالالىق دەنساۋلىق ساقتاۋ باسقارماسىمەن شەشىلەتىن بولادى. 2016-2019 ج ج. ارنالعان «دەنساۋلىق» مەملەكەتتىك باعدارلاماسىنا سايكەس وقۋشىلاردى تاماقتاندىرۋدى جاقسارتۋعا دا نازار اۋدارىلماق.
وسى وزگەرىستەر دەنساۋلىق ساقتاۋ ۇيىمدارى تاراپىنان ءبىرىڭعاي جەتەكشىلىك ەتۋدى قاجەت ەتەدى. قابىلدانعان شارالار مەكتەپ جاسىنداعى بالالارعا كورسەتىلەتىن مەديتسينالىق قىزمەتتەردىڭ ساپاسىن جاقسارتۋعا مۇمكىندىك بەرەدى.
