تۇركيا استاناسىندا ءاليحان بوكەيحانعا ارنالعان كىتاپ تانىستىرىلدى
تۇركى اكادەمياسى حالىقارالىق ۇيىمى، گازي ۋنيۆەرسيتەتى، تۇركيانىڭ يۋنەسكو ىستەرى جونىندەگى ۇلتتىق كوميسسياسى جانە ق. ا. ياساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ قولداۋىمەن ۇيىمداستىرىلعان ايتۋلى جيىنعا قازاقستان مەن تۇركيانىڭ مەملەكەت جانە قوعام قايراتكەرلەرى، تۇركى الەمىنىڭ كورنەكتى شىعىستانۋشى عالىمدارى مەن حالىقارالىق ۇيىم جەتەكشىلەرى قاتىستى.
كونفەرەنسيانىڭ اشىلۋ سالتاناتىن تۇركولوگيا زەرتتەۋ ورتالىعىنىڭ باسشىسى ءحۇليا كاساپوعلۇ، گازي ۋنيۆەرسيتەتى رەكتورىنىڭ ورىنباسارى سەرۆەت كاراباعى، ق. ا. ياساۋي اتىنداعى ح ق ت ۋ وكىلەتتى كەڭەس ءتوراعاسى مۇسا يىلدىز جانە تۇركى اكادەمياسىنىڭ پرەزيدەنتى دارحان قىدىر ءالى قۇتتىقتاۋ سوزدەرىمەن اشتى.
سونىمەن قاتار د. قىدىر ءالى جينالعاندارعا «تۇعىرلى تۇلعالار» سەرياسىنان «ءاليحان بوكەيحان جانە تۇركى الەمى» اتتى جاڭا كىتاپتى تانىستىردى. اكادەميا شىعارعان بۇل كىتاپتا ءا. بوكەيحاننىڭ تۇركى الەمىنە قاتىستى ءبىرقاتار ەڭبەكتەرى جيناقتالعان.
عىلىمي كونفەرەنسيادا «ءاليحان بوكەيحان جانە ءبىرتۇتاس الاش يدەياسى»، «ءاليحان بوكەيحان - بوستاندىق جولىنداعى كۇرەسكەر» دەگەن تاقىرىپتاردا قازاقستاننان كورنەكتى تاريحشى- عالىمدارى - پروفەسسور تۇرسىن جۇرتباي جانە پروفەسسور بەيبىت قويشىباي ءسوز سويلەدى. سونداي- اق ەديتەپە ۋنيۆەرسيتەتىنىڭ پروفەسسورى، بەلگىلى تۇرىك تاريحشىسى احمەت تاشاعىلدىڭ توراعالىعىمەن وتكەن سەكسيا جۇمىسىندا قازاق عالىمدارى سۇلتانحان ءجۇسىپ پەن رىسگۇل ءابىلحاميت قىزى سويلەدى.
حالىقارالىق تۇركى اكادەمياسىنىڭ باسپا ءسوز قىزمەتى حابارلاعانداي، حالىقارالىق كونفەرەنسيا جۇمىسى ق. ا. ياساۋي اتىنداعى حالىقارالىق قازاق- تۇرىك ۋنيۆەرسيتەتىنىڭ «ياسساۋي» مادەني قوعامىنىڭ كونسەرتىمەن اياقتالدى.
