الەم اپتا ىشىندە: شەنگەن توڭىرەگىندەگى شىرعالاڭ شيرىعىپ تۇر
وسىلايشا، ۇزاق ۋاقىتتان بەرى «لەناردو دي كاپريو ناگرادا الا ما، الماي ما؟» دەگەن تالايدىڭ كوكەيىندەگى ساۋالعا جاۋاپ بەرىلدى. ال ءدال وسى ساتتە كارى قۇرلىقتا بوسقىنداردىڭ لەگىنىڭ استىندا قالعان مەملەكەتتەر ءبىر-بىرىنەن شەكارالارىن جاۋىپ، دۇرلىگىپ جاتقان ەدى.
«وسكار» سىيلىعى تابىستالدى
وتكەن جەكسەنبىدە الەم جۇرتشىلىعى كينو ونەرى سالاسىنداعى باستى وقيعالاردىڭ ءبىرى «وسكار» سىيلىعىن تابىس ەتۋدىڭ 88- سالتاناتتى شاراسىن تاماشالادى.
وسى جولى توم ماككارتيدىڭ «ۆ سەنترە ۆنيمانيا» ءفيلمى ۇزدىك فيلم جانە ۇزدىك سەناري اتالىمىندا «وسكار» سىيلىعىنا يە بولدى. بۇل تۋىندى ا ق ش- تاعى ماجبۇرلەپ جىنىستىق قاتىناسقا سالۋ توڭىرەگىندەگى قىلمىستى شىنايى جۋرناليستىك تەرگەۋ توڭىرەگىندە ءوربيدى. بوستون گازەتىنىڭ ءتىلشىسى كاتوليك شىركەۋى وكىلدەرى ايىپتاعان پەدوفيلدىڭ بەت- بەينەسىن اشكەرە قىلادى.
ال ۇزدىك ەر ادام ءرولى ءۇشىن بەرىلەتىن «وسكار» سىيلىعى بۇل جولى «ۆىجيۆشيي» دراماسىندا اڭشى حيۋ گلاستىڭ ءرولىن سومداعان لەناردو دي كاپريوعا بۇيىردى. بۇل اكتەردىڭ ونەر جولىنداعى العاشقى مۇسىنشەسى. بۇل وعان دەيىن دە اتالعان سىيلىققا 5 مارتە اكتەر رەتىندە جانە 1 رەت پروديۋسەر رەتىندە ۇسىنىلعان بولاتىن. ايتا كەتەرلىگى، لەو ارمانىنا جەتىپ «وسكار» سىيلىعىن يەلەنگەن كەزدە Twitter جەلىسىن پايدالانۋىشار 1 مينۋتتىڭ ىشىندە 440 مىڭنان استام شاعىن جازبا قالدىرىپ، شاعىن بلوكتاعى جاڭا رەكوردتى ورناتتى.
ۇزدىك ايەل ءرولى «كومناتا» فيلمىندە باستى رولدە ويناعان بري لارسونعا بەرىلدى. فيلم سيۋجەتى جىلدار بويى 5 جاستاعى بالاسىمەن تار بولمەدە قامالعان بەلگىسىز ايەلدىڭ تاريحىنان سىر شەرتەدى.
كينواكادەميانىڭ شەشىمىمەن ۇزدىك رەجيسسەر دەپ «ۆىجيۆشي» ءفيلمى ءۇشىن مەكسيكاندىق الەحاندرو گونسالەس ينيارريتۋ تانىلدى. ال ونىمەن بىرگە جۇمىس ىستەگەن مەكسيكاندىق كينووپەراتور ەممانۋەل ليۋبەتسكي ۇزدىك وپەراتورلىق جۇمىسى ءۇشىن «وسكار» سىيلىعىنا لايىق دەپ تانىلدى.
رەجيسسەر دجوردج ميللەردىڭ «بەزۋمنىي ماكس: دوروگا ياروستي» مىناداي التى اتالىمدا ۇزدىك اتاندى: «سۋرەتشى- قويۋشىنىڭ ۇزدىك جۇمىسى»، «ۇزدىك كوستيۋمشى»، «ۇزدىك مونتاج»، «ۇزدىك گريم جانە شاش ۇلگىسى»، «ۇزدىك دىبىس» جانە «دىبىستى ۇزدىك مونتاجداۋ».
«ۇزدىك ءان» مۇسىنشەسىن 23 جاستاعى ءانشى سەم سميت پەن دجيممي نەيپس «007: سپەكتر» فيلمىندەگى «Writing's on the Wall» ءانى ءۇشىن الدى. ال امەريكا كينواكادەمياسىنىڭ «شەتەل تىلىندەگى ۇزدىك فيلم» اتالىمىنداعى سىيلىعى ۆەنگەرلىك رەجيسسەر لاسلو نەمەشتىڭ «سىن ساۋلا» فيلمىنە بەرىلدى.
شەنگەن توڭىرەگىندەگى شىرعالاڭ
بەيسەنبى كۇنى دانيا ۇكىمەتى ەۋروكوميسسيانى 3 -ساۋىرگە دەيىن ەلگە قۇجاتسىز ميگرانتتار اعىنىنىڭ الدىن الۋ ءۇشىن گەرمانيامەن اراداعى شەكاراسىندا باقىلاۋ ەنگىزۋ مەرزىمىن ۇزارتاتىندىعىن قۇلاقتاندىردى.
«بۇگىن تاڭەرتەڭ ەۋروكوميسسيا دات بيلىگىنەن 2016 -جىلدىڭ 3 -ساۋىرىنە دەيىن ىشكى شەكاراداعى ۋاقىتشا باقىلاۋدى ۇزارتاتىندىعى تۋرالى حات الدى»، - دەپ ءمالىم ەتتى ەۋروپالىق كوميسسيانىڭ رەسمي وكىلى ناتاشا بەرتو سول كۇنى وتكەن باسپا ءسوز ءماسليحاتى بارىسىندا.
ىرىكتەلگەن ءتولقۇجات باقىلاۋى گەرمانيادان جولاۋشىلار پويىزىمەن، اۆتوبۋسپەن جانە تەڭىز پارومىمەن كەلەتىن ازاماتتارعا قاتىستى ەنگىزىلگەنى اتالىپ وتىلگەن.
ەل ۇكىمەتى ۋاقىتشا شەكارالىق باقىلاۋدى 4 -قاڭتار كۇنى تاياۋ شىعىس پەن افريكا ەلدەرىنەن كەلەتىن ميگرانتتار لەگىنىڭ وسىمىنە جاۋاپ رەتىندە ەنگىزگەن بولاتىن. ەستە بولسا، شۆەتسيا دا دانيامەن شەكاراسىندا ءتولقۇجات باقىلاۋىن ەنگىزگەن ەدى.
ءبىر كۇن بۇرىن ستوكگولم شۆەد-دات شەكاراسىنداعى باقىلاۋدى 30 كۇنگە ۇزارتۋعا نيەت تانىتىپ وتىرعانىن حابارلاعان بولاتىن. مۇنداي مالىمدەمەنى ەلدىڭ ميگراتسيا ماسەلەلەرى جونىندەگى ءمينيسترى مورگان يۋحانسسون شۆەدتىڭ «Expressen» گازەتىنە بەرگەن سۇحباتىندا ايتقان- دى. «ەگەر ءبىز شەكارالىق باقىلاۋدان باس تارتار بولساق شۆەتسيانىڭ ىشكى قاۋىپسىزدىگى مەن تارتىبىنە قاتەر ءتونۋ قاۋپى ءالى دە بار»، - دەدى يۋحانسسون.
ونىڭ اتاپ وتۋىنشە، بۇل شارانى قابىلداۋداعى باستى سەبەپ ەلگە كەلىپ جاتقان بوسقىندارعا باسپانانىڭ جەتىسپەۋشىلىگى جانە ولاردىڭ سانىنىڭ وسى جىلدىڭ ىشىندە كۇرت ارتىپ كەتۋى بولىپ وتىر.
«اعىمداعى جىلدىڭ قاڭتارىندا تۇركيادان گرەكياعا اعىلعان بوسقىنداردىڭ سانى وتكەن جىلدىڭ قاڭتارىمەن سالىستىرعاندا 10 ەسە كوپ بولدى. ءبىز بوسقىندارعا ارنالعان باسپانالاردىڭ لىق تولۋى جاعدايىندا تۇرمىز»، - دەگەن ەدى ول.
وسىدان ءبىراز ۋاقىت بۇرىن عانا بوسقىنداردى قۇشاق جايا قارسى العان شۆەتسيا دا ەندىگى ۋاقىتتا رەكوردتىق كورسەتكىشكە جەتكەن ميگرانتتار لەگىمەن كۇرەسە المايتىندىعىن مالىمدەدى.
ستوكگولم مەن كوپەنگاگەننىڭ شەشىمى جاريا ەتىلگەننەن كەيىن بەلگيا مەن فرانتسيانىڭ شەكاراسىندا دا شەكارالىق باقىلاۋ رەجىمىنىڭ ۇزارتىلاتىندىعى تۋرالى اقپارات ەۋروپالىق قوعامداستىق ءۇشىن توسىن حابار بولماعانى تۇسىنىكتى.
بريۋسسەل 23 -اقپاننان باستاپ كورشى ەلدەرمەن شەكاراسىن جابۋىن 10 كۇندىك مەرزىمگە ۇزارتاتىندىعىن جاريالادى. ەلدىڭ مۇنداي قادامعا بارۋىنا فرانسيانىڭ كالە قالاسى تۇسىنداعى شاتىرلىق لاگەرلەر سۇرىلەتىندىگى تۋرالى شەشىم قابىلداعاننان كەيىن بوسقىنداردىڭ كوبەيۋ مۇمكىندىگى سەبەپ بولدى.
ايتا كەتەرلىگى، دۇيسەندى كۇنى فرانسيا بيلىگى كالەدەگى ميگرانتتار لاگەرلەرىن ءسۇرۋ جۇمىستارىنا كىرىسكەن ەدى. جەرگىلىكتى بيلىكتىڭ مالىمەتتەرىنە سايكەس ءسۇرىلۋى ءتيىستى لاگەرلەردە مىڭعا جۋىق بوسقىندار تۇرىپ جاتىر.
ايتا كەتەرلىگى، دانيا، شۆەتسيا جانە بەلگيادان بولەك نورۆەگيا، اۆستريا، گەرمانيا جانە فرانسيا ەلدەرى ءوز شەكارالارىنداعى ءتولقۇجات باقىلاۋىن جۇرگىزۋدە.
اۆتور: مارلان جيەمباي
