ۇلتتىق مۋزەيدە قىز- كەلىنشەكتەرگە قۇرمەت كورسەتىلدى - فوتو
ۇلتتىق مۋزەي ديرەكتورىنىڭ مىندەتىن اتقارۋشى جاكەن تايماعامبەتوۆ ءار سالادا ۇزدىك دەپ تانىلعان ايەل ازاماتتاردى قۇتتىقتاپ، شىعارماشىلىق جۇمىستارىنا ۇلكەن تابىستار تىلەدى.
- سىزدەردى بۇگىنگى كوكتەم مەرەكەسىمەن شىن جۇرەكتەن قۇتتىقتايمىن. وسى مەرەكە كوڭىلدەرىڭىزگە قۋانىش سىيلاپ، جۇزدەرىڭىزگە نۇر شاشسىن. ايەل ادامداردىڭ قۋانىشى وتانىمىزدىڭ مەرەيى. وسىناۋ ءبىزدىڭ ىستىق لەبىزىمىزدى قابىل الىڭىزدار، - دەدى ج. تايماعامبەتوۆ.
سالتاناتتى شارادا 30 جىلدان استام ۋاقىت مۋزەي سالاسىندا قىزمەت اتقارىپ كەلە جاتقان تۇرسىنكۇل جايلاۋبايەۆا، 40 جىل مۋزەي سالاسىندا قىزمەت ەتكەن ساعىمجان سادۋاقاسوۆا، ۇلتتىق مۋزەي ديرەكتورىنىڭ ورىنباسارى جازيرا كۇلبايەۆا، «يۋنۋس ەمرە» اتىنداعى تۇرىك مادەني ورتالىعىنىڭ ديرەكتورى مىندەتىن اتقارۋشى، ف. ع. د. , پروفەسسور الماگۇل يسينا، «التىن القا» يەگەرلەرى ۇلداناي الىمبايەۆا، باقىت كۇزەمبايەۆا سەكىلدى ەڭبەگىمەن ەلگە تانىلعان جانە وتباسىلارىنىڭ مەرەيىن اسىرىپ جۇرگەن ايەلدەر قاۋىمىنا ق ر ۇلتتىق مۋزەي ديرەكتورى دارحان مىڭبايدىڭ اتىنان العىس حاتتار تابىستالدى.
مەرەكەلىك دوڭگەلەك ۇستەلدەن كەيىن ارنايى كونسەرتتىك باعدارلاما ۇسىنىلدى. وتاندىق انشىلەرمەن قاتار ۇلتتىق مۋزەيدە قىزمەت ەتىپ جۇرگەن ەر ازاماتتار ءوز ونەرلەرىن كورسەتتى.
