تەننيس: دەۆيس كۋبوگى سايىسىندا قازاقستاندىق تەننيسشى سەربيا ويىنشىسىمەن ەسەپتى تەڭەستىردى

«قازسپورت» تەلەارناسىنان تىكەلەي ەفيردە كورسەتكەنىندەي، العاشقى پارتيانى قازاقستاننىڭ ءبىرىنشى راكەتكاسى 7:5، ەكىنشىسىن 6:2 ەسەبىمەن ۇتتى. ءۇشىنشى، شەشۋشى پارتيادا 3:0 ەسەبىمەن العا شىققان ميحايل كەزدەسۋدى وڭاي ۇتاتىنداي كورىنگەن.

ءبىراق بۇدان كەيىن ونىڭ قارقىنى باسەڭدەپ، سەربيالىق تەننيسشى ەسەپتى 2:3 كە دەيىن قىسقارتتى. وسىدان كەيىن كەزدەسۋ تىزگىنىن قايتا قولعا العان م. كۋكۋشكين ەسەپتى 5:2 گە جەتكىزدى. الايدا ءوزى دوپ بەرگەندە، بۇل باسىمدىلىقتى پايدالانا المادى. ەسەپ 4:5 كە دەيىن تاعى قىسقاردى. دەگەنمەن وسى ساتتە جەڭىسكە دەگەن جىگەرى مەن قايسارلىعىن تانىتا بىلگەن قازاقستاندىق تەننيسشى شەشۋشى گەيمدى ۇتا ءبىلدى. ءسويتىپ سوڭعى پارتيا 6:4 ەسەبىمەن قازاقستاندىق تەننيسشىنىڭ پايداسىنا اياقتالدى. 2 ساعات 37 مينۋتقا سوزىلعان ماتچتا الەمنىڭ 79- راكەتكاسى م. كۋكۋشكين دۇنيەجۇزىلىك رەيتينگتە وزىنەن الدەقايدا جوعارى، ياعني 23- ورىندا تۇرعان ۆ. ترويتسكيدى تىزە بۇكتىرىپ، ەسەپتى تەڭەستىردى.

مۇنىڭ الدىندا الەمنىڭ ءبىرىنشى راكەتكاسى نوۆاك دجوكوۆيچ قازاقستاندىق الەكساندر نەدوۆەسوۆتى ءۇش پارتيادا (6:1, 6:2, 6:3) وڭاي ۇتىپ، سەربيا قۇراماسىن 1:0 ەسەبىمەن العا شىعارعان ەدى.

5- ناۋرىز كۇنى جۇپتىق كەزدەسۋ وتەدى.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى