قازاقستاندا تابىس اكەلەتىن تۇمارعا بالاناتىن «تاعا» مونەتاسى شىعارىلدى

بۇل تۋرالى ق ر ۇلتتىق بانكىنىڭ باسپا ءسوز قىزمەتى حابارلادى.

«سيقىرلى نىشاندار» مونەتالار سەرياسىنان «proof» ساپالى كۇمىستەن نومينالى 100 تەڭگەلىك «تاعا» ەسكەرتكىش كۇمىس مونەتاسى تاعا تارىزدەس كۇردەلى پىشىندە جاسالعان.

تاعانى ۇيگە ساتتىلىك، تابىس، بايلىق اكەلەتىن، ءارى ەڭ ەجەلگى جانە ەڭ تانىمال تۇمار دەپ سانايتىندار بار. مۇنداي نانىم الەمنىڭ ءتۇرلى ەلدەرىندە كەڭىنەن تاراعان. كەلەتىن باق اعىپ كەتپەسىن دەپ تاعانىڭ ۇشىن جوعارى قاراتادى. مونەتانىڭ بەت جاعىندا (اۆەرسىندە) ورتالىق بولىگىندە مونەتانىڭ نومينالىن بىلدىرەتىن «100 تەڭگە» دەگەن جازۋ جانە مونەتا دايىندالعان مەتالدى، ونىڭ سىنامى مەن ماسساسىن بىلدىرەتىن «Ag 925 31.1 g» دەگەن جازۋ بار.

مونەتانىڭ جوعارعى بولىگىندە ستيلدەندىرىلگەن تاعانىڭ ۇشىندا ق ر ۇلتتىق بانكىنىڭ لوگوتيپى جانە قازاقستان تەڭگە سارايىنىڭ تاۋار بەلگىسى ورنالاسقان.

مونەتانىڭ سىرت جاعىندا (ريەۆەرسىندە) التىن جالاتىلعان تاعا بەينەسى ورناتىلعان، ورتاسىندا سپيرال ورنالاسقان، ونى اينالدىرا اعىلشىن تىلىندە «FOR LUCK»، مەملەكەتتىك تىلدە «ىسكە ءسات» جانە ورىس تىلىندە «نا سچاستە» دەگەن جازۋلار بار. جوعارعى بولىگىندە سوعىلعان جىلىن بىلدىرەتىن «2016» دەگەن سان بەرىلگەن.

925 سىنامالى كۇمىستەن دايىندالعان مونەتانىڭ تارالىمى 6 مىڭ دانا.

مونەتالاردى ۇلتتىق بانكتىڭ بارلىق فيليالدارىندا، سونداي-اق www.nationalbank.kz سايتىنداعى ينتەرنەت دۇكەن ارقىلى ساتىپ الۋعا بولادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى